Muzokaralar chog‘ida O‘zbekiston iqtisodiyotini suv-iqlim inqiroziga moslashtirish va jahon iqtisodiyotining yashil transformatsiyasiga yo‘naltirilgan loyihaning istiqbollari muhokama qilindi. Tashabbus 2025–2026-yillarda amalga oshirilishi rejalashtirilgan.

Rossiya tomoni Oʻzbekiston iqtisodiyotini oʻzgaruvchan suv va iqlim sharoitlariga oʻrta va uzoq muddatli moslashtirish boʻyicha asosli strategiyalarni ishlab chiqishga qaratilgan qoʻshma ilmiy tadqiqotlarni tashkil etishni taklif qildi. Amaliy tavsiyalarning tayyorlanishi nafaqat suv va iqlim muammolarini iqtisodiy va siyosiy tahlil qilish bo‘yicha O‘zbekiston ekspert markazlarining vakolatlarini kuchaytirish, balki ikki davlat o‘rtasidagi ilmiy hamkorlikni rivojlantirish yo‘lidagi muhim qadam bo‘lishi ta’kidlandi.

Vazir ushbu loyiha ilmiy tadqiqot hamkorligi, shuningdek, Markaziy Osiyo mintaqasida bilim va texnologiyalar almashinuvi uchun asosiy platformaga aylanishi mumkinligini taʼkidladi. Shu munosabat bilan ishchi guruh tuzib, Markaziy Osiyo atrof-muhit va iqlim o‘zgarishini o‘rganish universitetiga ("Green University") suv resurslarini boshqarish sohasidagi mutaxassislar bilan o‘zaro hamkorlik qilish uchun o‘quv tashrifini tashkil etishga ham e'tibor qaratildi.

Tadqiqot natijalari asosida “2050-yilgacha O‘zbekiston iqtisodiyotini suv-iqlim sharoitlari o‘zgarishiga moslashtirish strategiyasi” ishlab chiqilishi ko‘zda tutilgan.

Tomonlar, shuningdek, 2025-yilda hamkorlikni kengaytirish, jumladan, o‘zaro manfaatli natijalarga erishish uchun “Atrof-muhitni asrash va "yashil" iqtisodiyot yili” doirasida qo‘shma ilmiy loyihalarni amalga oshirish va muntazam maslahatlashuvlar o‘tkazishga kelishib oldilar.