Qahramonlarimiz Islom Karimov nomidagi Toshkent Xalqaro aeroportida tantanali kutib olindi. Marosimda O’zbekiston Respublikasi Prezidenti Administratsiyasi departament rahbari Odil Abdurahmanov, Yoshlar siyosati va sport vazirligi, Milliy Olimpiya va Paralimpiya qo’mitalarining rahbariyati, keng sport jamoatchiligi ishtirok etdi. 

Tadbirda Odil Qalandarovich Xitoy maydonlarida yurtimiz sharafini mardonavor himoya qilib kelgan para-atletlarimizga o’zining tabrigini yo’lladi. Xususan, O.Abdurahmanov bu natijalar Prezidentimiz tomonidan Paralimpiya harakatini rivojlantirishga qaratilayotgan ulkan e’tibor va g’amxo’rlikning samarasi ekanini ta’kidladi. O’z navbatida, so’zga chiqqan sportchi va murabbiylarimiz davlatimiz tomonidan yaratib berilgan sharoitlar uchun minnatdorchilik bildirib, kelajakda bundanda ulkan yutuqlarni qo’lga kiritishga va’da berishdi. 

Marosim davomida Yozuvchilar uyushmasi mutasaddilari, xalqimiz ardog’idagi shoirlar ham para-sportchilarimizga o’z tabriklarini yo’llashdi. Shundan so’ng delegatsiya a’zolari ajratilgan maxsus avtobuslarda shahrimizning diqqatga sazovor joylari bo’ylab aylanib, Paralimpiya qo’mitasi tomon yo’l olishdi. 

Eslatib o’tamiz, O’zbekiston delegatsiyasi ortda qolgan Para Osiyo o’yinlarida 25 ta oltin, 24 ta kumush va 30 bronza, jami 79 ta medal qo’lga kiritib, medallar soni bo’yicha o’z tarixidagi eng yaxshi natijani yangiladi.