XMKning Turkiya va Markaziy Osiyo boʻyicha mintaqaviy direktori Vibke Shlomer bilan uchrashuv

Yig‘ilishda Iqtisodiyot va moliya vazirining o‘rinbosari – Bobur Xo‘jayev, mehmonlardan XMKning O‘zbekistondagi vakolatxonasi rahbari Zafar Xashimov, XMKning O‘zbekistondagi dasturlari koordinatori Sajida Toshpo‘latova va boshqa mas’ul vakillar ishtirok etishdi.

Suhbat chog‘ida ijtimoiy sohada davlat-xususiy sheriklik (DXSh) hisobidan moliyalashtirilayotgan loyihalar muhokama qilindi. Xalqaro moliya korporatsiyasi (XMK) kimyo sektorini isloh qilish va geotermal energetikani rivojlantirish bo‘yicha takliflarini bildirdi. Shu bilan birga, hududlarda suv ta’minoti tarmog‘i hamda yashil infratuzilmani rivojlantirish masalalari ko‘rib chiqildi.

Shuningdek, muloqot doirasida tomonlar O‘zbekistonda amalga oshirilayotgan loyiha va islohotlarni jadallashtirish bo‘yicha qabul qilinayotgan tegishli chora-tadbir va qarorlar yuzasidan fikr almashdilar.

Muzokaralar yakunida tomonlar yuqorida qayd etilgan sohalarda amaldagi loyihalarni jadallashtirish va istiqboldagi loyihalarni ishlab chiqishni faollashtirishga kelishib oldilar.