Ushbu konferensiya yetakchi ekspertlar, hukumat, fan va biznes vakillari, fuqarolik jamiyati hamda xalqaro tashkilotlarni zamonaviy muammolarga yechim ishlab chiqish uchun birlashtiruvchi platforma bo‘lib xizmat qiladi. Tadbir 100 dan ortiq mamlakatlardan 1600 ga yaqin ishtirokchilarni o‘zida jamlaydi. Konferensiyaning maqsadi dunyoning barcha mamlakatlari tomonidan birgalikda kelishilgan 2030-yilga qadar BMTning barqaror rivojlanish maqsadlarini amalga oshirishni jadallashtirish bo'yicha aniq tashabbuslarni ishlab chiqish hisoblanadi.

Konferensiya doirasida KfW Taraqqiyot banki ijro kengashi a’zosi Kristian Laybah hamda O‘zbekiston Respublikasi Bosh vaziri o‘rinbosari – Iqtisodiyot va moliya vaziri Jamshid Qo‘chqorov o‘rtasida uchrashuv bo‘lib o‘tdi.

Uchrashuvda KfW Taraqqiyot banki ijro kengashi a’zosi Stefan Opits hamda Makroiqtisodiy va hududiy tadqiqotlar instituti direktori Umid Obidxo‘jayev va boshqa mas’ul vakillar ishtirok etdi.

Ma’lumot uchun: KfW Taraqqiyot banki 60 yildan ortiq vaqt davomida Germaniya federal hukumatiga rivojlanish siyosati va rivojlanish bo'yicha xalqaro hamkorlik maqsadlariga erishishda yordam berib kelmoqda. KfW tajribali bank bo‘lish bilan birgalikda rivojlanish instituti ham hisoblanib, moliyalashtirish, rivojlanish siyosati bo‘yicha ekspert bilimlari hamda ko‘p yillik milliy va xalqaro darajadagi tajribaga ega.

Muhokamalar davomida tomonlar barqaror iqtisodiy o‘sish, kelgusi yillar davomida budjetni qo‘llab-quvvatlash, shuningdek, ta’lim, aholini ish bilan ta’minlash, sog‘liqni saqlash, ijtimoiy himoya tizimini rivojlantirish, yashil o‘sishni ta’minlash hamda energetika sohasini takomillashtirishni o‘z ichiga olgan O‘zbekiston-Gemaniya moliyaviy hamkorligi yuzasidan fikr almashdilar.

Shuningdek, uchrashuv doirasida O‘zbekiston Respublikasi hukumati hamda Germaniyaning KfW taraqqiyot banki o‘rtasida “Ijtimoiy va yashil o‘sish” dasturi bo‘yicha Davlat budjetini qo‘llab-quvvatlash yuzasidan bitim imzolandi.

Muzokaralar yakunida tomonlar o‘zaro manfaatli aloqalarni rivojlantirish va mustahkamlash hamda budjetni qo‘llab-quvvatlash yo‘nalishida doimiy hamkorlik yuritish yuzasidan kelishib oldilar.