EPAM bilan hamkorlikning yangi istiqbollari

Uchrashuvda Sherzod Shermatov O‘zbekiston Respublikasi Raqamli texnologiyalar vaziri, Farhod Ibragimov Enterprise Uzbekistan Boshqaruv raisi, Lazizbek Xudayev IT Park Uzbekistan rezidentlar bilan ishlash bo‘yicha direktori, Yuriy Antanyuk EPAM vitse-prezidenti hamda Renat Axtyamov EPAM Uzbekistan rahbari ishtirok etdi.

Muhokamalarning ustuvor yo‘nalishlari:

EPAM Campus modeli asosida sun’iy intellekt bo‘yicha ta’lim va kadrlar tayyorlash tizimini rivojlantirishga qaratilgan SI Academy Uzbekistan’ni tashkil etish;

Davlat boshqaruvida Agentic AI texnologiyalarini qo‘llash, jumladan, tajriba-sinov loyihalarini amalga oshirish imkoniyatlarini o‘rganish;

Texnologik salohiyatni oshirish va davlat sektorining raqamli transformatsiyasi bo‘yicha hamkorlikni kengaytirish.

EPAM’ning O‘zbekistondagi ko‘p yillik faoliyatiga tayangan holda, mazkur tashabbuslar sun’iy intellekt sohasida malakali kadrlar tayyorlash hamda davlat sektorida innovatsion raqamli yechimlarni joriy etishni jadallashtirish uchun yangi imkoniyatlar yaratishi mumkin.

SI Academy Uzbekistan’ni tashkil etish

Muhokamalarning asosiy yo‘nalishlaridan biri EPAM bilan hamkorlikda Super Intelligence Academy Uzbekistan’ni tashkil etish tashabbusi bo‘ldi. Ta’lim platformasini nazariy tayyorgarlikni amaliy mashg‘ulotlar va real texnologik vazifalar ustida ishlash bilan uyg‘unlashtiradigan EPAM Campus modeli asosida yo‘lga qo‘yish rejalashtirilmoqda.

Akademiya konsepsiyasi uchta yo‘nalishni qamrab oladi:

Yoshlarni axborot texnologiyalari va sun’iy intellekt asoslariga bepul o‘qitish;

Sun’iy intellekt bo‘yicha mutaxassislarni tayyorlash va ularning malakasini oshirishga qaratilgan maxsus ta’lim dasturlarini tashkil etish;

Davlat xizmatchilarini ish jarayonlari samaradorligini oshirish uchun sun’iy intellekt texnologiyalaridan foydalanishga o‘rgatish.

Mazkur tashabbus malakali mutaxassislar tayyorlash imkoniyatlarini kengaytirish va O‘zbekistonda sun’iy intellekt sanoatini rivojlantirish uchun qo‘shimcha ta’lim infratuzilmasini shakllantirishga xizmat qilishi mumkin.

Davlat sektorida sun’iy intellektdan foydalanish

Uchrashuvda davlat boshqaruvida Agentic AI — ko‘p bosqichli vazifalarni mustaqil bajarish va raqamli tizimlar bilan o‘zaro ishlash imkoniyatiga ega sun’iy intellekt texnologiyalarini qo‘llash istiqbollari ham muhokama qilindi.

Hamkorlikning mumkin bo‘lgan yo‘nalishlaridan biri sifatida O‘zbekiston davlat sektorining ehtiyojlarini hisobga olgan holda, ushbu texnologiyalarni qo‘llash bo‘yicha ikki-uchta amaliy ssenariyni ishlab chiqish masalasi ko‘rib chiqildi.

Bunda axborot xavfsizligini ta’minlash va davlatga oid maxfiy ma’lumotlarni himoya qilishga alohida e’tibor qaratiladi. Dastlabki bosqichda vazifalari, texnik talablari va amalga oshirish muddatlari aniq belgilangan bitta pilot loyihani ishga tushirish imkoniyatini ko‘rib chiqish taklif etildi.

Shuningdek, EPAM’ning davlat sektorida raqamli yechimlarni joriy etish bo‘yicha xalqaro tajribasini o‘rganish va istiqbolli amaliyotlarni O‘zbekiston ehtiyojlariga moslashtirish masalalari muhokama qilindi.

Mavjud hamkorlikni rivojlantirish

EPAM O‘zbekistonning xalqaro texnologik hamkorlaridan biri hisoblanadi. 1993-yilda AQShda tashkil etilgan kompaniya dasturiy ta’minot ishlab chiqish, bulutli texnologiyalar, ma’lumotlar tahlili, sun’iy intellekt va raqamli transformatsiya yo‘nalishlarida faoliyat yuritadi. 2026-yilning ikkinchi choragi holatiga ko‘ra, kompaniyaning global jamoasi 62 800 nafardan ortiq xodimni birlashtirgan.

EPAM O‘zbekistonda 2019-yildan buyon faoliyat yuritadi. Ayni paytda kompaniyaning mamlakatda ikkita ofisi mavjud bo‘lib, ularda 600 nafardan ortiq mutaxassis ishlaydi. Ular 70 dan ortiq xalqaro mijozlarga xizmat ko‘rsatishda ishtirok etadi.

Kompaniya IT-ta’limni rivojlantirishda ham faol qatnashmoqda. Toshkent axborot texnologiyalari universiteti, INHA va Amity universitetlari negizida Java, NET, JavaScript va DevOps yo‘nalishlari bo‘yicha ta’lim laboratoriyalari faoliyat yuritadi.

Hamkorlikning muhim natijalaridan biri IT Park University’ning tashkil etilishi bo‘ldi. Universitetning ilk bitiruvchilari 2025-yilda diplom oldi. Birinchi bitiruv 75 nafar mutaxassisni qamrab oldi.

SI Academy Uzbekistan tashabbusi va sun’iy intellekt sohasidagi istiqbolli loyihalar yuzasidan muhokamalar kadrlar tayyorlash, texnologik kompetensiyalarni rivojlantirish hamda davlat sektorida zamonaviy raqamli yechimlarni joriy etish bo‘yicha EPAM bilan hamkorlikni kengaytirish uchun yangi imkoniyatlar yaratishi mumkin.