“Rothschild&Co” kompaniyasi vakillari bilan uchrashuv bo‘lib o‘tdi

Uchrashuvda mehmonlar tomonidan “Rothschild&Co” kompaniyasining boshqaruvchi direktori, MDH bo‘yicha rahbari Jovanni Salvetti, kompaniyaning qayta qurish va moliyalashtirish bo‘yicha maslahatchisi Saymon Bard, “Rothschild & Co” kompaniyasining MDH mamlakatlari bo'yicha bosh direktori Oleg Pushkarev ishtirok etdi.

O‘zbek vakillari tomonidan Iqtisodiyot va moliya vaziri o‘rinbosari Jasur Karshibayev, “O‘zsanoatqurilishbank” ATB boshqaruv raisi Aziz Akbarjonov hamda boshqa mas’ul vakillar ishtirok etdi.

Ma’lumot uchun: “Rothschild&Co” kompaniyasi Rotshild oilasining fransuz va ingliz tarmoqlari tomonidan nazorat qilinuvchi moliyaviy - xolding kompaniyasi hisoblanadi. “Rothschild” bank faoliyati sohasida investitsiya-bank xizmatlari, korporativ bank xizmatlari, xususiy kapital qo‘yilmalar, aktivlarni boshqarish va xususiy bank xizmatlarini qamrab oladi.

Muloqot davomida tomonlar mamlakatimizdagi iqtisodiy jarayonlar, xususan, bosqichma-bosqich amalga oshirilayotgan islohotlar, jumladan, energetika sohasida bozor tamoyillariga o‘tish yuzasidan bajarilgan ishlar va ularning natijalari, bank-moliya sohasini yangi bosqichga ko‘tarish va davlat ishtirokidagi banklarni xususiylashtirish, tog‘-kon sohasida faoliyat yuritayotgan kompaniyalarning transformatsiya jarayonlarini muhokama qildilar.

Shuningdek, suhbatda tomonlar banklarni xususiylashtirish yuzasidan o‘zaro tajribalar, “Rothschild & Co” kompaniyasining O‘zbekistondagi faoliyati hamda yuqoridagi qayd etilgan yo‘nalishlarda hamkorlik qilish yuzasidan fikr almashdilar.

Muzokaralar yakunida tomonlar o‘zaro hamkorlik aloqalarini rivojlantirish va oldinga qo‘yilgan maqsadlarga erishishda tizimli faoliyat olib borishga kelishib oldilar.