Sport vazirligida Germaniyaning Prosica GmbH kompaniyasi vakillari bilan uchrashuv bo‘lib o‘tdi

Uchrashuvda O‘zbekiston Respublikasi sport vaziri Adkham Ikramov, O‘zbekiston Davlat sport akademiyasi rektori Ilhomjon Tursunaliev hamda Prosica GmbH kompaniyasining katta maslahatchisi Trang Do ishtirok etdi.

Ta'kidlash joizki, Prosica GmbH ta’lim, amaliy tadqiqotlar, texnologiyalar transferi va inson resurslarini xalqaro rivojlantirish yo‘nalishlarida faoliyat yuritadi. Kompaniya axborot texnologiyalari (IT) va sun’iy intellekt (AI) sohasidagi loyihalarni amalga oshirish, raqamli transformatsiya jarayonlarini qo‘llab-quvvatlash, raqamli ko‘nikmalarni rivojlantirish hamda inson kapitalini zamonaviy talablar asosida takomillashtirishga ixtisoslashgan.

Muloqot chog‘ida O‘zbekistonda futbolni rivojlantirish, sport ta’limi tizimini raqamlashtirish, sun’iy intellekt va zamonaviy raqamli texnologiyalarni ta’lim jarayoniga joriy etish, shuningdek, xorijiy tillarni o‘qitish sohasida o‘zaro hamkorlikni yo‘lga qo‘yish masalalari muhokama qilindi.

Tadbir doirasida mehmonlar O‘zbekiston Davlat sport akademiyasida yaratilgan shart-sharoitlar, ta’lim jarayoni, ilmiy-tadqiqot va innovatsion faoliyat, sportchilarni tayyorlash tizimi hamda akademiyaning xalqaro hamkorlik yo‘nalishlari bilan tanishdilar.

Tomonlar mazkur yo‘nalishlarda qo‘shma ta’lim va ilmiy loyihalarni amalga oshirish, ilg‘or xalqaro tajribani joriy etish hamda o‘zaro manfaatli hamkorlikni yanada kengaytirish yuzasidan fikr almashdilar.

Mehmonlar Olimpiya shaharchasidagi sport inshootlari va majmualarda o‘tkazilayotgan sport musobaqalarini ham ko‘zdan kechirdilar.