Turkiyaning “Anadolu Group” kompaniyasi vakillari bilan hamkorlik istiqbollari muhokama qilindi

Uchrashuvda “Samarqand Avtomobil zavodi” MCHJ XK Bosh direktori Neshet Fatih Vural, Investitsiyalar, sanoat va savdo vaziri o‘rinbosari vazifasini bajaruvchi Akrom Aliyev, Davlat aktivlarini boshqarish agentligi direktori Sohibjon Murodov hamda boshqa mas’ul vakillar ishtirok etdi.

Ma’lumot uchun: “Anadolu Group” Turkiyaning yirik biznes guruhlaridan biri hisoblanadi. Kompaniya chakana savdo, ichimliklar, qishloq xo‘jaligi, avtomobilsozlik, energetika, sanoat va boshqa yo‘nalishlarda faoliyat yuritadi. Guruh xalqaro miqyosdagi faoliyati, ishlab chiqarish tajribasi, ilmiy-tadqiqot salohiyati va ko‘p tarmoqli biznes portfeli bilan ajralib turadi.

Muloqot davomida tomonlar O‘zbekiston va Turkiya o‘rtasidagi iqtisodiy hamkorlikni amaliy mazmun bilan boyitish, xususan, mashinasozlik sanoati yo‘nalishida yangi loyihalarni ilgari surish, mavjud ishlab chiqarish salohiyatidan samarali foydalanish hamda investitsiya tashabbuslarini kengaytirish masalalariga alohida e’tibor qaratdi.

Uchrashuvda ishlab chiqarish quvvatlarini oshirish, mahsulot turlarini diversifikatsiya qilish, mahalliylashtirish darajasini kuchaytirish hamda sanoat kooperatsiyasini rivojlantirish bo‘yicha fikr almashildi. Mazkur yo‘nalishlar yuqori qo‘shilgan qiymatga ega mahsulotlar ishlab chiqarishni kengaytirish nuqtayi nazaridan muhim ahamiyat kasb etishi ta’kidlandi.

Muloqotda xususiylashtirish jarayonlari orqali iqtisodiyotda xususiy sektor ulushini izchil kengaytirish masalalari yuzasidan fikr almashildi. Shuningdek, tomonlar yangi istiqbolli yo‘nalishlarda qo‘shma tashabbuslarni ishlab chiqish, ilg‘or boshqaruv tajribasi va zamonaviy texnologik yechimlarni jalb etish, mahalliy korxonalar bilan sanoat kooperatsiyasini chuqurlashtirish imkoniyatlarini ko‘rib chiqdi.

Uchrashuv yakunida tomonlar hamkorlikni izchil davom ettirish va amaliy natijalarga qaratilgan muloqotni muntazam ravishda olib borishga tayyor ekanliklarini bildirdi.