TRASEKA Bosh kotibi lavozimiga O‘zbekiston vakili saylandi: Ostonadagi yig‘ilish yakunlari

Tadbirda O‘zbekiston Transport vaziri Ilhom Maxkamov, vazir o‘rinbosari Jasurbek Choriyev va TRASEKAning O‘zbekistondagi milliy koordinatori Bekzod Xolmatov ishtirok etdi.  

Yig‘ilish kun tartibidagi asosiy masala — tashkilot Bosh kotibi lavozimiga saylov o‘tkazildi. Ovoz berish natijalariga ko‘ra, O‘zbekiston tomonidan ilgari surilgan nomzod — Transport vaziri o‘rinbosari Jasurbek Choriyev TRASEKA Bosh kotibi etib saylandi. 

Ushbu tayinlov O‘zbekistonning mintaqaviy transport integratsiyasini rivojlantirishdagi faol rolining navbatdagi e’tirofidir.  

Yagona tranzit ruxsatnomasi — transport harakati uchun «yashil yo‘lak»

Tadbirning muhim amaliy natijasi sifatida O‘zbekiston, Qozog‘iston, Ozarbayjon, Qirg‘iziston va Ukraina o‘rtasida «TRASEKA yagona tranzit ruxsatnoma blankasi to‘g‘risida»gi Hukumatlararo Bitim imzolandi.  

Mazkur hujjat yuk tashuvchilarga bitta ruxsatnoma blankasi bilan Bitimga a’zo bir nechta davlatlar hududidan hech qanday qo‘shimcha ruxsatnomalarsiz o‘tish imkonini beradi. 

Bu ma’muriy to‘siqlarni bartaraf etish va tranzit vaqtini sezilarli darajada qisqartirishga xizmat qiladi.  

Strategik tashabbuslar  

Yig‘ilish davomida Transport vaziri Ilhom Maxkamov nutq so‘zlab, koridor jozibadorligini oshirishga qaratilgan bir qator muhim takliflarni ilgari surdi. 

Jumladan:  

- Transport jarayonlarini to‘liq raqamlashtirish va «qog‘ozsiz tranzit»ga o‘tish; 

- Yo‘nalishlardagi mavjud cheklovlarni bartaraf etish; - Normativ-huquqiy bazani xalqaro standartlar asosida takomillashtirish zarurligi alohida ta’kidlandi; 

- Tashkilot faoliyatiga xalqaro moliya institutlari grantlari va imtiyozli kreditlarini jalb qilish choralarini ko‘rish.  

Hukumatlararo komissiya yig‘ilishi yakunida mintaqaviy transport aloqalarini mustahkamlash va TRASEKA doimiy kotibiyati faoliyatini takomillashtirishga qaratilgan tegishli qarorlar qabul qilindi.