JBIC Boshqaruv raisi bilan hamkorlikni kengaytirish istiqbollari muhokama qilindi

Uchrashuvda JBIC energetika va tabiiy resurslarni moliyalashtirish yo‘nalishi bo‘yicha global guruh rahbari, katta ijrochi direktor Tatsushi Amano, korporativ rejalashtirish departamenti maslahatchisi Ryo Ishizuka,  hamda Iqtisodiyot va moliya vaziri o‘rinbosarlari Ilhomjon Umrzakov va Xurshed Mustafayev, vazir maslahatchisi Jasur Karshibayev va boshqa mas’ul vakillar ishtirok etdi.

Uchrashuvda tomonlar o‘zaro manfaatli hamkorlik aloqalarining joriy holati hamda istiqbollarini muhokama qildi. Xususan, JBIC ishtirokida amalga oshirilayotgan loyihalar va ularni moliyalashtirish masalalariga e’tibor qaratildi.

Jumladan, muhokamalar davomida tomonlar davlat-xususiy sheriklik (DXSH) asosida amalga oshirilayotgan infratuzilma loyihalari, xususan, sog‘liqni saqlash, energetika, shu jumladan, qayta tiklanuvchi energiya manbalaridan foydalanishni yanada kengaytirish va transport-logistika infratuzilmasini rivojlantirish yo‘nalishidagi tashabbuslarga alohida to‘xtalib o‘tdi.

Shuningdek, tomonlar loyihalarga yapon kompaniyalarini jalb qilish hamda loyihalarni moliyalashtirish masalalari yuzasidan fikr almashdi.

Muzokaralar yakunida tomonlar o‘zaro manfaatli hamkorlikni yanada rivojlantirish, qo‘shma loyihalar ko‘lamini oshirish va samaradorlikni yanada oshirishga kelishib oldi.