“Rothschild & Co” kompaniyasi vakillari bilan uchrashuv boʻlib oʻtdi

Maʼlumot uchun: “Rothschild & Co” — xalqaro miqyosda yetakchi moliyaviy maslahat va investitsiya xizmatlarini koʻrsatuvchi kompaniya boʻlib, 200-yildan ortiq tarixga ega. Kompaniya strategik moliyaviy maslahatlar, qoʻshilish va sotib olish bitimlari, xususiylashtirish jarayonlari, kapital bozorlariga chiqish, aktivlarni boshqarish hamda davlat va xususiy sektor uchun kompleks moliyaviy yechimlar taqdim etishga ixtisoslashgan.

Muloqot davomida tomonlar Oʻzbekistonda amalga oshirilayotgan keng koʻlamli iqtisodiy islohotlarning borishi va ustuvor yoʻnalishlarini atroflicha muhokama qildi. Xususan, energetika sohasida bozor tamoyillariga bosqichma-bosqich oʻtish doirasida koʻrilayotgan chora-tadbirlar, ushbu islohotlarning samaralari, bank-moliya tizimini rivojlantirish va davlat ishtirokidagi banklarni xususiylashtirish jarayonlari yuzasidan fikr almashildi.

Shuningdek, yirik davlat korxonalarini transformatsiya qilish, ularning korporativ boshqaruv tizimini takomillashtirish hamda investitsion jozibadorligini oshirish masalalari muhokama markazida boʻldi.

Muzokaralar yakunida tomonlar oʻzaro manfaatli hamkorlikni yanada rivojlantirish, belgilangan ustuvor yoʻnalishlarda tizimli va izchil hamkorlik olib borish hamda muloqotlarni davom ettirishga kelishib oldi.