Yetakchi banklar uchun startapchilarning loyihalari taqdimot qilindi hamda startapchilar va banklar o‘rtasida bu kabi hamkorlik uchrashuvlarini muntazam tashkil etib borishga kelishildi

Joriy yilning 8-may kuni yetakchi bank rahbarlari bilan bo‘lib o‘tgan dastlabki uchrashuvda venchur va startap ekotizimini rivojlantirish bo‘yicha hamkorlikni yo‘lga qo‘yish va tizimli ravishda startaplar asoschilari bilan uchrashuvlar o‘tkazib borishga kelishib olingan edi. 

Bugungi taqdimotda Prezidentning iqtisodiyot sohalarini rivojlantirish, investitsiya va tashqi savdo siyosatini amalga oshirish masalalari bo‘yicha maslahatchisining birinchi o‘rinbosari Timur Ishmetov hamda Raqamli texnologiyalar vaziri Sherzod Shermatov, O‘zbekistondagi yetakchi banklar rahbar-xodimlari, shuningdek, kompaniyalarning startapchilari ishtirok etdi.

Ushbu hamkorlik yig‘ilishida Sug‘urta Bozor, Jett, Mohirdev, Coozin, Ustabor, Depozit.uz – Finq, Beautify, AirCaravan, The Mind, YOTO, KPI, Cradle AI, zypl.ai startapchilarning taqdimotlari o‘tkazildi. 

Tadbirda Plug and Play Uzbekistan vakili ham so‘zga chiqdi. Unda kompaniyaning O‘zbekistondagi faoliyati va Plug and Play kompaniyasining dunyoning yetakchi banklari bilan o‘zaro hamkorlik qilish tajribasi haqida qisqacha ma’lumot berildi.

Bundan tashqari, taqdimoti o‘tkazilgan barcha startaplarni har bir bankda joriy qilish uchun alohida taqdimotlar qilish masalalari muhokama qilindi.

Taqdimot yakunida yaratilgan startaplar uchun investitsiyalar jalb qilish va mahsulotlarni bank tizimlariga ham joriy qilish imkoniyatlari muhokama qilindi. Shuningdek, startaplar va banklar o‘rtasida muntazam uchrashuvlarni tashkil etib borish hamda kelgusida o‘zaro hamkorlikda ishlashga kelishib olindi.