BMTning Yevrosiyo iqtisodiy komissiyasi bilan strategik hamkorlikni kengaytirish masalalari muhokama qilindi

Yig‘ilish kun tartibidan aylanma iqtisodiyot, “yashil” o‘sish va “yashil” iqtisodiyotga o‘tish jarayonini rag‘batlantirish uchun BMT YIKning tegishli vositalari va imkoniyatlarini muhokama qilish hamda “Vision – 2030” jamg‘armasi doirasidagi salohiyatli loyihalarni amalga oshirish bo‘yicha fikr almashish o‘rin oldi.  

Suhbat boshida Molchan xonim Uchinchi Toshkent Xalqaro investitsiya forumidagi ishtirokidan mamnunligi va O‘zbekistonda olib borilayotgan izchil islohotlarni qo‘llab-quvvatlashini bildirib, erishilgan yutuqlarni yuqori baholadi. O‘z navbatida, O‘zbekiston tomonidan ham BMT Yevrosiyo iqtisodiy komissiyasining 2030-yilgacha Barqaror rivojlanish kun tartibini amalga oshirishdagi faol hissasi va sa’y-harakatlari katta ahamiyat kasb etishi ta’kidlandi.

“Vision – 2030” jamg‘armasi doirasida sog‘liqni saqlash va ta’lim sohalariga yo‘naltirilgan ikkita loyiha, xususan, respublika bo‘ylab perinatal markazlarni zarur tibbiy asbob-uskunalar bilan ta’minlash hamda maktablar, malaka oshirish markazlarini zamonaviy IT-texnologiyalar bilan jihozlash kabi ishlar faol amalga oshirilayotgani bo‘yicha ma’lumotlar berildi.

Uchrashuvda, shuningdek, iqlim barqarorligini ta’minlash, energiya samaradorligini oshirish hamda chiqindilarni boshqarish tizimini takomillashtirish va ularning ekologik vaziyatga salbiy ta’sirini kamaytirishyo‘nalishlariga qaratilgan bir qator qo‘shma loyihalarni tatbiq etish lozimligi borasida mulohazalar bildirildi.

Muhokamalar yakuniga ko‘ra, tomonlar asosiy ustuvorliklar va qarashlarni inobatga olgan holda, o‘zaro hamkorlikni yanada chuqurlashtirishga kelishib oldilar.