Jahon banki bilan hamkorlikda zamonaviy havo sifati laboratoriyasini yaratish masalalari muhokama qilindi

Uchrashuv davomida Jahon bankining O‘zbekistondagi ekologik islohotlarni qo‘llab-quvvatlashdagi faol roli alohida qayd etildi. Ekologiya vazirligining Ekologiya va iqlim o‘zgarishi milliy qo‘mitasiga aylantirilishi mamlakatning ekologik va iqlim dasturlarini amalga oshirishda yangi bosqichni boshlashi ta’kidlandi.

Tomonlar yangilangan milliy belgilangan hissasi (NDC 3.0)ni amalga oshirish masalasiga alohida e’tibor qaratdilar. O‘zbekiston kengaytirilgan iqlim majburiyatlarini e’lon qilgan — 2035-yilga qadar YAIM birligiga to‘g‘ri keladigan issiqxona gazlari tashlamalarini 50 foizga qisqartirish va 2060-yilga kelib uglerod neytralligiga erishish. Qo‘mita raisi navbatdagi vazifa — yirik maqsadlardan amaliyotga o‘tish, aniq va moliyalashtiriladigan loyihalarni shakllantirish ekanini ta’kidladi.

Muhokamaga qo‘yilgan asosiy mavzulardan biri — Toshkentdagi havo sifati bo‘ldi. Poytaxtda PM2.5 ko‘rsatkichlari Jahon sog‘liqni saqlash tashkiloti tavsiyalaridan ancha yuqori ekani qayd etildi. Tomonlar sanoat obyektlarida tozalash tizimlarini modernizatsiya qilish, monitoring va hisobot tizimini isloh qilish, shuningdek, ekologik talablarni shaharsozlik va transport siyosatiga integratsiya qilish bo‘yicha choralarni ko‘rib chiqdilar.

O‘zbekiston tomonidan bildirilgan muhim takliflardan biri — Markaziy Osiyodagi birinchi zamonaviy havo sifati laboratoriyasini "Green University" (Markaziy Osiyo atrof-muhit va iqlim o‘zgarishini o‘rganish universiteti) bazasida yaratishdir. Ushbu laboratoriya ifloslantiruvchi moddalarni chuqur tahlil qilish, tashlamalar manbalarini aniqlash, monitoring tarmoqlari uskunalarini kalibrlash va aholining sog‘lig‘ini muhofaza qilish bo‘yicha ilmiy asoslangan tavsiyalar ishlab chiqish imkonini beradi. Loyiha qiymati taxminan 1 million dollarni tashkil etishi, uni Jahon banki bilan hamkorlikda amalga oshirish mumkinligi qayd etildi.

Tomonlar, shuningdek, "Green University"ni ekologiya va iqlim fanlari bo‘yicha mamlakatning asosiy ta’lim va ilmiy markaziga aylantirish masalalarini muhokama qildilar. Qo‘shma ta’lim dasturlarini yaratish, innovatsiyalarni joriy etish va universitetni mintaqaviy tajriba almashish maydonchasiga aylantirish imkoniyatlari ko‘rib chiqildi.

Uchrashuv yakunida O‘zbekiston tomoni Sameh Vahbani yirik xalqaro tadbirlar — "Eco-Expo Central Asia 2026" va GEFning 8-Assambleyasida ishtirok etishga taklif etdi. Tomonlar O‘zbekistonning barqaror va iqlimga chidamli rivojlanishini qo‘llab-quvvatlash yo‘lida hamkorlikni mustahkamlashga tayyor ekanini tasdiqladilar.