Iqtisodiyot va moliya vaziri boshchiligidagi Oʻzbekiston delegatsiyasi Saudiya Arabistonida

Oʻzbekiston Respublikasi Bosh vaziri oʻrinbosari – Iqtisodiyot va moliya vaziri Jamshid Qoʻchqorov boshchiligidagi Oʻzbekiston delegatsiyasi Saudiya Arabistonida Jahon iqtisodiy forumi doirasidagi Rivojlanish uchun global hamkorlik, o‘sish va energetika mavzusiga bag‘ishlangan maxsus uchrashuv hamda Islom taraqqiyot banki (ITB) tashkil etilganining 50 yilligiga bag‘ishlangan tadbirda ishtirok etdi. Uchrashuvda ko‘plab biznes va xalqaro tashkilotlar, davlatlar, hukumatlar rahbarlari qatnashib, xalqaro hamkorlik istiqbollarini muhokama qildi.

ITB yig‘ilishini Saudiya Arabistoni moliya vaziri Muhammad Al-Jadaan va ITB guruhi prezidenti Muhammad Al-Jassir olib bordi. Kun tartibida ITBga aʼzo mamlakatlarni iqtisodiy oʻsishda qoʻllab-quvvatlashni jadallashtirish, xususiy sektorni rivojlantirish, raqamli texnologiyalarni joriy etish va “yashil” iqtisodiyot orqali iqlim oʻzgarishi oqibatlarini yumshatish masalalari ko‘rib chiqildi.

Uchrashuvda Islom taraqqiyot bankining iqtisodiy qiyinchiliklarni yengib o‘tishga ko‘maklashish va Barqaror rivojlanish maqsadlariga erishishga hissa qo‘shish orqali rivojlanayotgan a’zo mamlakatlarni qo‘llab-quvvatlash borasidagi tashabbuslari muhimligi ta’kidlandi.

Bank ko‘magida sog‘liqni saqlash, ta’lim, ichimlik suvi ta’minotini yaxshilash, qishloq va suv xo‘jaligini rivojlantirishga qaratilgan yirik investitsiya loyihalari amalga oshirilgani aytib o‘tildi.

O‘zbekiston delegatsiyasining tashrifi doirasida Saudiya Arabistoni, Quvayt, Turkiya va Indoneziya kabi davlatlar moliya vazirlari bilan ikki tomonlama samarali uchrashuvlar o‘tkazilib, ularda iqtisodiy islohotlar va “O‘zbekiston – 2030” rivojlanish strategiyasi xalqaro hamjamiyat tomonidan e’tirof etildi.