O‘zbekiston Respublikasi Vazirlar mahkamasi huzuridagi Qurilish va uy-joy kommunal xo‘jaligi sohasida nazorat qilish inspeksiyasi

O‘zbekiston Respublikasi Vazirlar Mahkamasining 2025-yil 24-fevraldagi 110-sonli qaroriga muvofiq, qurilish ishlarini boshlash uchun davlat ro‘yxatidan o‘tmagan obyektlar bo‘yicha tegishli hujjatlarni rasmiylashtirish, ro‘yxatdan o‘tkazish va shu asosda foydalanishga ruxsat berish ishlari 2025-yil 1-iyulgacha uzaytirildi. Mazkur qaror ijrosini ta’minlash hamda noqonuniy qurilishlarning oldini olish maqsadida Qurilish va uy-joy kommunal xo‘jaligi sohasida nazorat qilish inspeksiyasi tomonidan respublika bo‘ylab yig‘ilishlar o‘tkazilmoqda. Navbatdagi yig‘ilish Surxondaryo viloyatida inspeksiya rahbari Sirojiddin Eshquvvatov boshchiligida bo‘lib o‘tdi. Tadbirda viloyat prokuraturasi, hokimlik vakillari, tegishli boshqarmalar, buyurtmachi tashkilotlar hamda viloyat hududida faoliyat yuritayotgan tadbirkorlik subyektlari vakillari ishtirok etdi. Yig‘ilish davomida qurilish sohasidagi kamchiliklar, ularning oldini olish choralari, noqonuniy qurilishlarni bartaraf etish bo‘yicha amaliy mexanizmlar hamda mutasaddi tashkilotlar o‘rtasidagi hamkorlikni kuchaytirish masalalari muhokama qilindi.