Farg‘ona shahrida 14 qavatli bino qurilishida xavfsizlik va sifat talablari buzilganligi aniqlandi.
2026-02-16 15:10:00 / Yangiliklar
Farg‘ona viloyati Qurilish va uy-joy kommunal xo‘jaligi sohasida hududiy nazorat qilish inspeksiyasi xodimlari tomonidan Farg‘ona shahri “Shakarqishloq” mahallasi hududida qurilayotgan 14 qavatli turar joy binosida navbatdagi nazorat tadbiri o‘tkazildi.
O‘rganishlar davomida shaharsozlik normalari va qoidalari hamda texnika xavfsizligi talablariga rioya etilmagani aniqlandi. Jumladan:
Binoning 12-qavatidagi ST-1 rusumli ayrim metall ustunlar korroziyaga qarshi himoyalanmagan;
Binoning 9-qavatidan 12-qavatigacha bo‘lgan qismida ventilyatsiya shaxtalari ochiq qoldirilgan bo‘lib, belgilangan tartibda vaqtinchalik to‘siqlar bilan yopilmagan;
Obyektda texnika xavfsizligi qoidalariga to‘liq rioya etilmagan.
Aniqlangan qoidabuzarliklar yuzasidan qurilishning masʼul shaxslariga nisbatan bajarilishi majburiy bo‘lgan yozma ko‘rsatmalar berildi hamda ularning ijrosi inspeksiya tomonidan nazoratga olindi.
