Kegeyli tumaniga “Vatanparvarlik va saxovat karvoni” yetib bordi
2024-08-20 18:40:00 / Yangiliklar
Xalqimizda mehr-oqibat, xayr-saxovat va ezgulik kabi qadriyatlar azaldan ulugʻlanib kelinishining boisi ham shu. Ayniqsa, yurtimizda mustaqilligimizning 33 yillik bayrami shukuhi kezib yurgan kunlarda markazdan olisroqdagi ovul va qishloqlarda istiqomat qilayotgan yurtdoshlarimiz holidan xabar olish, ularga moddiy va maʼnaviy koʻmak berish, tibbiy xizmatlar koʻrsatishdek hayrli ishga qoʻl urgan yurt himoyachilarining navbatdagi manzili Kegeyli tumanining “Juzim bogʻ” ovuli boʻldi.
Kegeyli tumanining “Juzim bogʻ” ovulida aholi salomatligini mustahkamlash, ularga beriladigan tibbiy maslahat va muolajalar sifatini oshirish maqsadida Shimoli-gʻarbiy harbiy okrug qoʻmondonligi tomonidan Nukus harbiy gospitali, shuningdek, tuman tibbiyot birlashmasi shifokorlaridan iborat tibbiy brigada tomonidan vatandoshlarimizga chuqurlashtirilgan tibbiy koʻriklar oʻtkazish xizmati koʻrsatildi.
Aholiga salomatlik ulashish maqsadida kelgan Nukus harbiy gospitali mutaxassislari tomonidan aholi va bolalar uchun begʻaraz tibbiy koʻriklar oʻtkazilib, tezkor laboratoriya tashxisi, ultratovushli apparat tekshiruvi hamda boshqa shifokorlarning sayyor qabuli tashkil etildi. Tibbiy tekshiruvlar davomida statsionar davolanishga muhtoj boʻlganlarga yoʻllanmalar berilgan boʻlsa, qolganlarga tibbiy maslahat va muolajalar shu yerning oʻzida koʻrsatildi. Jismonan imkoniyati cheklangan, nogiron va keksa yoshdagilarning xonadonlariga borilib, ularga tegishli tibbiy tekshiruvlar oʻtkazildi.
Inson qadri sarbaland yurtda bagʻrikenglik, saxovatpeshalik, yiqilganni suyash, chorasiz qolganlarga koʻmak berish, nogiron va boquvchisini yoʻqotgan oʻksik koʻngillarga mehr ulashish xalqimizga xos azaliy qadriyatlardan hisoblanadi.
“Bir boʻlsak – yagona xalqmiz, birlashsak – Vatanmiz!” shiori ostida yurtimiz boʻylab keng oʻtkazilayotgan harbiy xizmatchilar tomonidan saxovat va koʻmak tadbirlari, vatanparvarlik festivallari xalq va armiya yakdilligini namoyish etib, “Armiya va xalq – bir tanu, bir jon!” degan ezgu gʻoyaning amalda ifodalab kelmoqda. Ana shunday xayriya aksiyalari doirasida mahallalarda “Armiya va yoshlar” uchrashuvlari, festival va konsert dasturlari oʻtkazilib, vatanparvarlikni tarannum etuvchi kuy va qoʻshiqlar ovul ahli va yoshlarga bir olam shodlik ulashib kelmoqda.
Shimoli-gʻarbiy harbiy okrug matbuot xizmati