Jizzax viloyati Mirzacho‘l tumani hokimligi

Sizlarni va butun xalqimizni qadimiy va hamisha navqiron bayram - Navro‘zi olam bilan chin yurakdan samimiy tabriklayman.

Bugungi munavvar kunni elu yurtimiz bilan tinch va xotirjam kutib olayotganimiz uchun Yaratganga cheksiz shukronalar aytamiz.

Bu yilgi Navro‘z muqaddas Ramazon oyida, uning tabarruk fazilatlariga uyg‘un holda o‘tayotgani bayramga alohida ruh, o‘zgacha fayz va quvonch bag‘ishlamoqda.

Qalblarimiz shodlikka to‘lgan shunday barokatli kunlarda yurtimiz mo‘min-musulmonlarini, butun islom ummatini Ramazoni sharif bilan yana bir bor qutlab, jamiki pok niyatlarimiz ijobat bo‘lishini tilaymiz.

Shunday shukuhli va ulug‘ kunlar barchamizga muborak bo‘lsin!

Qadrli bayram qatnashchilari!

Navro‘zi olam 3 ming yillik davlatchiligimiz tarixida o‘zining beqiyos ma’naviy ahamiyati bilan hamisha alohida e’tibor topgan buyuk bayramdir.

Bu yilgi bayram “Navro‘z – qadimiy va navqiron bayram” degan bosh g‘oya asosida o‘tkazilayotgangi bejizga emas.

Xalqimiz asrlar davomida og‘ir va mashaqqatli, sinovli paytlarda ham bu bayramni olijanob tabiati va qadriyatlari bilan asrab-avaylab kelgani chinakam moʻjizadir.

Ayniqsa, insonning tabiat va borliq bilan uyg‘unligi, yaratuvchanlik ishtiyoqi, g‘ayrat va shijoati, o‘zaro hamjihatlik, mehr-oqibat va saxovat kabi olijanob fazilatlari Navro‘z timsolida yanada yorqin namoyon bo‘ladi.

Navro‘z kunlarida bobo dehqonlarimiz rizq-ro‘zimiz, dasturxonimiz qut-barakasini o‘ylab, ona zaminga o‘z mehrini beradi, mo‘l hosil olish niyatida qattiq bel bog‘laydi.

Hech shubhasiz, yuksak bunyodkorlik ruhi Yangi O‘zbekistonimizda amalga oshirilayotgan ulkan islohotlar va jadal o‘zgarishlarning asl mazmuni va ezgu g‘oyalariga hamohangdir.

Butun yurtimiz qiyofasi tobora go‘zal va obod bo‘lib bormoqda. “Yashil makon” umummilliy loyihasi doirasida tumanimizda yangi ekologik muhit yaratilmoqda.

Ma’lumki, xalqimiz qadimda Navro‘zni “yil boshi” deb atagan. Biz ham ajdodlarimiz kabi shu ajoyib kunda:

Sharqona Yangi yilimiz qutlug‘ kelsin, daryolarimiz suvga, omborlarimiz hosilga to‘lsin!

Aziz va moʻtabar ustoz-murabbiylarimiz, fidoyi shifokorlarimiz, iqtisodiyotimiz tayanchi bo‘lgan g‘ayratli tadbirkorlarimiz, yurtimiz posbonlari hamisha sog‘-omon bo‘lsin!

Oldimizga qo‘ygan baland marralar va ulug‘ rejalar to‘liq ro‘yobga chiqsin! deb yaxshi niyatlar qilamiz.

Muhtaram yurtdoshlar!

Navro‘z - yoshlik va shijoat ayyomidir.

Hayotga katta orzu-umidlar bilan kirib kelayotgan yoshlarimiz Yangi O‘zbekistonning ilg‘or va qudratli kuchiga aylanib borayotganiga barchamiz guvohmiz.

Azmu shijoatli, iste’dodli farzandlarimizning dadil va mardona harakatlari butun dunyoda katta aks-sado berayotgani bizni benihoya quvontiradi.

Tadbirkorlik rivojiga yangi kuch va shiddat berayotgan ham aql-idrokli, serg‘ayrat va ishbilarmon o‘g‘il-qizlarimizdir.

Sarhadlarimizda doimo sergak turgan askar va ofiserlar ham mard va jasur o‘g‘lonlarimizdir.

Hurmatli bayram ishtirokchilari!

Navro‘zning betakror sehru jozibasi, eng avvalo, mahallalarimizda o‘tkazilayotgan xalq sayillarida, bayram tantanalarida o‘z ifodasini topadi.

Ko‘p ming yillik an’analar va zamonaviy qadriyatlarimizni o‘zida mujassam etgan mahalla tizimining hayotimizdagi o‘rni va ta’siri tobora ortib bormoqda.

Ayniqsa, turli muammo va masalalarni mahallaning o‘zida hal etayotganimiz islohotlarimiz xalqchilligi va natijadorligini keskin oshirmoqda.

Bu yilning muhtaram yurboshimiz tomonidan “Mahallani rivojlantirish va jamiyatni yuksaltirish yili” deb nom berilish bejizga emas.

Fursatdan foydalanib, 22-mart kuni mamlakatimizda keng nishonlanadigan Mahalla tizimi xodimlari kuni bilan barcha yurtdoshlarimizni, mahalla faollarini samimiy tabriklab, ularning sharafli faoliyatida ulkan yutuqlar tilayman.

Azizlar!

Ayni kunlarda mirishkor dehqon va fermerlarimiz katta orzu-niyatlar bilan yangi mehnat mavsumini boshlamoqda.

Mana shu qutlug‘ ayyom kunlarda fermerlarmiz ulkan hirmon ko‘tarishga o‘z xissalarigizni qo‘shgan holda oldimizdagi rejalarni uddalab, yuzimiz yorug‘ bo‘lishini tilab qolaman.

Muhtaram otaxon va onaxonlar!

Munis opa-singillar!

Qadrli aka-ukalar!

Ushbu unutilmas, dilbar lahzalarda siz, azizlarni, barcha-barcha yurtdoshlarimizni Navro‘z bayrami bilan yana bir bor qutlayman.

Har bir xonadonga, butun yurtimizga tinchlik, baxtu saodat va fayzu baraka tilayman!

Qadriyatlaring boqiy bo‘lsin, Navro‘z!

Navro‘zi olam muborak bo‘lsin!