2025-yil “Open Budget” 1-mavsumi doirasida ta’lim tashkiloti 1045 ta ovoz bilan g‘olib deb topildi. Loyiha uchun ajratilgan 1 milliard 400 million so‘m mablag‘ “Laziz” MChJ pudrat tashkiloti tomonidan bajarilgan ta’mirlash ishlariga yo‘naltirildi. Qurilish jarayonlari noyabr oyida to‘liq yakunlanib, muassasa faoliyatini zamonaviy qiyofada davom ettira boshladi.

Ta’mirlangan infratuzilma – bolalar uchun qulay va xavfsiz muhit

Ta’mirlash jarayonida muassasada quyidagi asosiy ishlar amalga oshirildi:

• barcha eshik va derazalar yangilandi;

• issiq suv va isitish tizimi qaytadan o‘rnatildi;

• binoning ichki va tashqi fasadi to‘liq ta’mirlandi;

• ichki hojatxonalar va kanalizatsiya tizimi zamonaviy talablarga moslashtirildi;

• o‘quv xonalari yorug‘, issiq va shinam holatga keltirildi;

• bolalar uchun xavfsiz o‘yin va dam olish hududlari yaratildi.

Ta’mirdan avval ancha abgor holatga kelib qolgan muassasa bugun bolalar uchun munosib va zamonaviy ta’lim muhitiga ega bo‘ldi. Yaratuvchan muhit ota-onalarda ham katta mamnunlik uyg‘otmoqda.

Yangilangan ta’lim maskani Mirzacho‘l tuman hokimi Mirzakulov Botirjon Kazakboevich boshchiligida o‘tkazilgan ochilish marosimida foydalanishga topshirildi. Tadbir davomida ta’lim tarbiyasi uchun yaratilgan sharoitlar ko‘zdan kechirilib, yangi jihozlangan xonalar bolajonlarga taqdim etildi.

Bugun kichkintoylar issiq va shinam xonalarda qulay sharoitlarda maktabgacha ta’limni davom ettirmoqda. Tuman aholisining fikricha, ushbu loyiha farzandlar kelajagi uchun muhim qadam bo‘ldi va maktabgacha ta’lim sifatini oshirishga xizmat qiladi.

1-sonli davlat maktabgacha ta’lim tashkilotining yangilanishi Mirzacho‘l tumanida maktabgacha ta’limga bo‘lgan e’tiborning ortib borayotgani, bolalar uchun yaratilayotgan imkoniyatlar kengayganining yaqqol dalilidir.

Muassasaning yangilangan ko‘rinishi kelajak avlod tarbiyasi yo‘lida muhim qadam bo‘lib, bog‘cha jamoasi faoliyati uchun keng imkoniyatlar yaratadi.

Mirzacho`l tuman hokimligi Axborot xizmati