Jizzax viloyati Mirzacho‘l tumani hokimligi

Jizzax viloyatining Mirzacho‘l tumanida “Ayollar – ekologik madaniyatning faol targ‘ibotchisi” mavzusida ayollar eko-forumi doirasida turkum ma’naviy-ma’rifiy tadbirlar bo‘lib o‘tdi. Tadbir O‘zbekiston Ekologik partiyasi tomonidan Mirzacho`l tuman hokimligi, Oila va Xotin-qizlar boshqarmasi va tuman bo`limlari, Ekologiya, atrof-muhitni muhofaza qilish va iqlim o‘zgarishi boshqarmasi va tuman bo`limlari, tuman IIB, tuman Mudofaa bo`limi, Musiqa va san`at maktabi, Yoshlar ishlari agentligi hamda Sport bo`limi hamkorligida tashkil etildi.

Forum tadbirlari “5000 qadam yurish” aksiyasi bilan boshlandi. 250 nafardan ziyod ishtirokchilar, xotin-qizlar O‘zbekiston shoh ko‘chasidan Mirzacho‘l tuman hokimligi binosigacha bo‘lgan masofani piyoda bosib o‘tishdi. Mazkur aksiya sog‘lom turmush tarzini targ‘ib qilish, yoshlar va aholida ekologik ongni oshirishga qaratildi.

Shuningdek, forum doirasida Gagarin shaharchasi, Mustaqillik mahallasi va Farovon ko‘chasida “Tozalik va ozodalikka e’tibor – sog‘lom muhit garovi” shiori ostida plogging – chiqindilarni yig‘ish aksiyasi ham o‘tkazildi. Aholi va yoshlar ishtirokida o‘tkazilgan ushbu tadbirda hududlar chiqindilardan tozalandi, bu esa tabiatni asrash va ekologik madaniyatni yuksaltirish yo‘lida amaliy qadam bo‘ldi.

Tadbirda  forum ishtirokchilari daraxt ekish aksiyasida ham qatnashdilar. Bu tashabbus atrof-muhitni asrash, yashil maydonlarni kengaytirish va sog‘lom ekologik muhitni shakllantirishga qaratilgan amaliy harakat sifatida forumning mazmunini yanada ochib berdi. Bu amaliy tashabbus — nafaqat atrof-muhitni asrash, balki har bir inson qalbida “tabiatga mehr” tuyg‘usini mustahkamlashga qaratilgan ezgu harakat bo‘ldi. Aksiyada turli yoshdagi fuqarolar, ayollar, tashkilotchilar hamda tuman faollari birgalikda ko‘chat ekib, “yashil makon” g‘oyasiga o‘z hissasini qo‘shdilar.

Yangi ekilgan har bir nihol — bu nafaqat tabiatni bezovchi daraxt, balki kelajak avlodlar uchun toza havo, musaffo muhit, hayotbaxsh tabiat timsoliga aylandi.

Mazkur aksiya orqali Mirzacho‘l tumanida yashil hududlarni kengaytirish, ekologik muvozanatni mustahkamlash va sog‘lom hayot tarzini targ‘ib etish yo‘lida yana bir muhim qadam tashlandi. Forum ishtirokchilari bu tadbirni “Tabiatga hurmat — inson qalbining pokligi” degan ezgu g‘oyaning amaliy ifodasi, har bir fuqaroning shaxsiy burchi sifatida baholadilar.

Kun davomida forum doirasida ayollar o‘rtasida sport va sog‘lom turmush tarzini targ‘ib etuvchi bir qator musobaqalar ham tashkil etildi. Ular orasida voleybol, stol tennisi, shaxmat va shashka bellashuvlari alohida qiziqish uyg‘otdi.

Bu bahslar nafaqat sport musobaqasi, balki ayollarning irodasi, jamoaviylik va do‘stlik timsoliga aylandi. Har bir ishtirokchi o‘z jamoasining faxrini himoya qilgan holda, sog‘lom raqobat, o‘zaro hurmat va birdamlik muhitini yaratdi. Sport zalida ayollar har bir to‘p uchun kurashar, tennischilar aniqlik va chaqqonlikda bellashar, tomoshabinlar esa qizg‘in raqobatni olqishlar, g‘olib va faol ishtirokchilarni qarsaklar bilan ruhlantirib turishdi. Bu musobaqalar ayollarning faolligini, jismoniy chiniqish va sog‘lom hayotga intilishini yanada namoyon etdi.  Shu tariqa sport musobaqalari forumninng badiiy va ma’naviy ruhini yanada boyitdi, “Sog‘lom ayol — sog‘lom jamiyat” g‘oyasining hayotiy ifodasiga aylandi.

Tadbirning ahamiyati nafaqat tuman, balki butun viloyat miqyosida sezildi. Unda Sirdaryo va Samarqand viloyatlaridan, shuningdek Jizzax viloyatining boshqa tuman va shaharlaridan ham O‘zbekiston Ekologik partiyasi faollari tashrif buyurib, forumda faol ishtirok etdilar. Ularning qatnashuvi tadbirga hududlararo tajriba almashuv ruhini olib kirdi, ekologik madaniyatni rivojlantirishda hamjihatlik va birdamlik namunasiga aylandi.

Forumning amaliy qismi yakunlangach, Mirzacho‘l tumanidagi musiqa maktabida ekologiyaga oid rasm tanlovi va badiiy dastur tashkil etildi. Tadbirda umumta’lim maktablari o‘quvchilari, san’at maktabi o‘quvchilari hamda yosh ijodkorlar o‘z ishlari bilan qatnashishdi.

Tanlovda bolalar o‘z rasm va ijodiy ishlari orqali tabiatga mehr, atrof-muhitni asrash, suv va havo tozaligi, chiqindisiz hayot kabi muhim ekologik g‘oyalarni ifoda etdilar. “Tabiat – hayot manbai”, “Yashil makon – sog‘lom kelajak”, “Tabiatni asrash – burchimiz” kabi nomdagi ijodiy asarlar tomoshabinlarda katta taassurot qoldirdi.

Badiiy dastur davomida san’at maktabi o‘quvchilari tomonidan ekologiya mavzusiga bag‘ishlangan qo‘shiqlar, sahna ko‘rinishlari va she’rlar ijro etildi. Yosh ijrochilarning chiqishlari orqali “Inson va tabiat uyg‘unligi” g‘oyasi yanada yorqin ifoda topdi.

Tadbir yakunida kun davomidagi tadbir va musobaqalarning g‘oliblari va faol ishtirokchilari O‘zbekiston Ekologik partiyasi hamda Mirzacho`l tuman hokimligi tomonidan faxriy yorliqlar, esdalik sovg‘alari hamda tashakkurnomalar bilan taqdirlandilar. Ularning quvonchi va faxr tuyg‘usi butun zalni iliq kayfiyatga burkadi.

Tuman hokimligi vakillari ta’kidlashicha, bunday tadbirlar yoshlarning tabiatga mehrini oshirish, ekologik muammolarga befarq bo‘lmaslik va har bir fuqaroning atrof-muhitga mas’uliyatli munosabatini shakllantirishda muhim ahamiyat kasb etadi.

Tadbir so‘nggida esa “Bir piyola choy ustida suhbat” tashkil etildi. Unda tuman hokimligi rahbariyati, ekologiya sohasidagi mutasaddilar, o‘qituvchilar, yoshlar va ayollar jamoasi ishtirok etib, ochiq muloqot shaklida fikr almashdilar.

Suhbat chog‘ida ekologik madaniyatni rivojlantirish, hududda chiqindilarni saralash tizimini yo‘lga qo‘yish, yoshlarning ekologik tashabbuslarini qo‘llab-quvvatlash masalalari muhokama qilindi. Qizg‘in fikrlar, yangi taklif va g‘oyalar bildirildi.

Ishtirokchilar bu kabi samimiy muloqotlar jamiyatda ekologik ongni oshirish va ijtimoiy birdamlikni mustahkamlashda katta ahamiyatga ega ekanini e’tirof etdilar.

Mirzacho‘l tumanidagi mazkur tadbirlar nafaqat ayollar va yoshlarning ekologik bilimini oshirdi, balki jamiyatda “Tabiatga e’tibor – kelajak avlodga hurmat” degan ezgu g‘oyani yanada chuqur singdirdi, “Ayollar – ekologik madaniyatning faol targ‘ibotchisi” eko-forumi o‘z mazmuni va ahamiyati bilan ekologik ongni mustahkamlash, ayollar va yoshlarning tabiatga mas’uliyatli munosabatini kuchaytirishga xizmat qildi.

Mirzacho`l tuman hokimligi Axborot xizmati