Toshkent shahar Mirobod tumani hokimligi

Mirobod tumani hokimligida tuman hokimi Anvar Sayfutdinov ishtirokida mehnat migratsiyasida bo‘lgan xotin-qizlarni qo‘llab-quvvatlash hamda ularni Vatanga qaytarish masalalariga bag‘ishlangan onlayn formatdagi ochiq muloqot tashkil etildi.

Tadbirda Toshkent shahar hokimi o‘rinbosari Sh. Sultonova, mas’ul tashkilotlar va faol ayollar ishtirok etdilar. Uchrashuv davomida mehnat migratsiyasida bo‘lgan ayollarning huquqlarini himoya qilish, ularni munosib ish bilan ta’minlash, oila bag‘riga qaytishlariga ko‘maklashish hamda qayta ijtimoiy moslashuv jarayonlarini qo‘llab-quvvatlash bo‘yicha amaliy takliflar muhokama qilindi.
 
Muloqotning asosiy maqsadi — xorijda mehnat qilayotgan yurtdosh ayollar bilan doimiy aloqani yo‘lga qo‘yish, ularga psixologik, huquqiy va moddiy yordam ko‘rsatish orqali ularning Vatanga qaytishi uchun qulay shart-sharoit yaratishdan iboratdir.

Tuman hokimi Anvar Sayfutdinov ta’kidlaganidek:
“Har bir yurtdosh ayolimizning taqdiri biz uchun muhim. Ularga nafaqat mehnat, balki munosib hayot sharoiti yaratish — davlat siyosatining ustuvor yo‘nalishidir.”

Uchrashuv yakunida mehnat migratsiyasida bo‘lgan xotin-qizlarni qo‘llab-quvvatlash bo‘yicha amaliy “yo‘l xaritasi” ishlab chiqish va joylarda ushbu yo‘nalishdagi ishlarni tizimli ravishda tashkil etish vazifalari belgilab olindi.