Toshkent shahar Mirobod tumani hokimligi

Mirobod tumanida hokim Anvar Sayfutdinov rahbarligida yoshlar bilan ishlashning o‘ziga xos tizimi yo‘lga qo‘yilgan. Bu tizimda asosiy e’tibor — rasmiy hisobotlarga emas, balki har bir yoshning hayotiy yo‘li va kelajagini to‘g‘ri yo‘naltirishga qaratiladi.

Shunday uchrashuvlardan biri bugun, 29 oktyabr kuni "Oltinko‘l" mahallasida bo‘lib o‘tdi. Yangi bino, o‘tgan yili foydalanishga topshirilganiga qaramasdan, bugungi kunda tuman yoshlarining muhokama va mulohaza maydoniga aylanib ulgurgan.

"Biz sizning kuchingizga ishonamiz. Siz — yangi kuch-g‘ayrat va yangi tafakkurga ega avlodsiz. Sizlar tuman rivojining harakatlantiruvchi kuchi, uning kelajagisizlar".
Anvar Sayfutdinov, Mirobod tumani hokimi

Uchrashuvdagi eng muhim jihat — bu quruq so‘zlar emas, balki amaliy ishlar bo‘ldi. Hokim har bir yoshning shaxsiy holatini chuqur o‘rganib, muammolarni shaxsan hal etishga kirishdi.

Ta’sirli voqealar

 Maktabga qatnashga qiynalayotgan bitiruvchi

11-sinf o‘quvchisi o‘z daromadining barchasini taksiga sarflab, o‘qishga yetib borishda qiynalayotgani, shu sababli o‘qishni yaqinroq maktabga ko‘chirishni o‘ylayotganini bildirdi. Hokim unga bitiruvgacha bor-yo‘g‘i olti oy qolganini eslatib, maktabni ko‘chirmaslikni maslahat berdi. Shuningdek, u yigitning ish joyiga shaxsan qo‘ng‘iroq qilib, maoshini oshirish masalasini hal qilishini bildirdi. Muammo o‘sha zahoti yechildi.

Tajribasiz hisobchi qiz

Hisobchilik kursini yakunlagan yosh qiz ish tajribasi yo‘qligi sababli ishga joylasha olmayotganini aytdi. U hatto tajriba orttirish uchun bepul ishlashga ham tayyor edi. Anvar Sayfutdinov uning fidoiyligini yuqori baholab, uni tumandagi maktablardan biridagi tajribali hisobchiga shogird sifatida biriktirishni topshirdi. Endi u nafaqat amaliy ko‘nikmalarga, balki rasmiy ish stajiga ham ega bo‘ladi.

Uch farzandli yosh ota

25 yoshli, oilasi va uch farzandi uchun mas’ul bo‘lgan yigit ish izlayotganini ma’lum qildi. Hokim unga "masala ko‘rib chiqiladi" demay, aniq taklif berdi — uni tumanning yong‘in xavfsizligi xizmatiga ishga joylashtirish masalasini shaxsan nazoratga olishini bildirdi. Endi bu katta oilada barqarorlik va ishonchli kelajak paydo bo‘ldi, Mirobod tumanida esa yana bir mas’uliyatli qutqaruvchi ish boshlaydi.

Uchrashuv davomida ayrim yoshlar kibersport bilan shug‘ullanish uchun kompyuter xonasi ochish istagini ham bildirishdi. Hokim bu g‘oyani tinglab, shunday dedi:
"Men buni hurmat qilaman, ammo sizning avlodingiz kitob o‘qishga, kasb egallashga ham ahamiyat berishi kerak. Tumanimizdagi robototexnika markazi bazasida kibersport kurslarini tashkil etamiz, lekin bu yo‘nalish hobbi sifatida qolishi to‘g‘riroq, deb o‘ylayman".

Uchrashuvda ishtirok etgan yigirma nafar yoshning har biri eshitildi. Har birining muammosi individual yondashuv asosida ko‘rib chiqildi — kimgadir maslahat va yo‘l-yo‘riq berildi, kimningdir tizimli muammosi amaliy hal etildi.

Anvar Sayfutdinovning yoshlar bilan muloqotidagi bunday ochiq, samimiy va insonparvar yondashuvi — bu faqat samarali boshqaruv emas, balki haqiqiy rahbarlik maktabidir. Mirobod tumanining kelajagi balandparvoz shiorlarda emas, balki yoshlarga bo‘lgan e’tibor va ishonchda namoyon bo‘lmoqda