Toshkent shahar Mirobod tumani hokimligi

Hurmatli bitiruvchilar, aziz yoshlar!
Qadrli ota-onalar va fidoyi ustozlar!

Bugun Mirobod tumanidagi maktablarning 11-sinfini 2402 nafar, 9-sinfini 2749 nafar bitiruvchi yoshlarimiz tamomlab, hayotning yangi va mas’uliyatli bosqichiga qadam qo‘ymoqda. Bu kun — faqat bitiruv kuni emas. Bu kun — orzularingizga qanot beradigan, kelajakka ishonch uyg‘otadigan, katta hayot eshiklari ochiladigan unutilmas palladir.

Bugungi kunda dunyo shiddat bilan o‘zgarmoqda. Zamon esa bilimli, tashabbuskor, zamonaviy fikrlaydigan va o‘z ustida tinimsiz ishlaydigan yoshlarni oldinga olib chiqmoqda. Shu ma’noda, Mirobod yoshlari uchun yaratilayotgan imkoniyatlar, avvalo, sizlarni ana shunday kuchli avlod sifatida tarbiyalashga xizmat qilmoqda.
 

Quvonarlisi, tumanimiz poytaxtda xorijiy tillarni o‘qitish bo‘yicha yetakchi hududlardan biriga aylanmoqda. Bugun ko‘plab yoshlarimiz xalqaro sertifikatlar, zamonaviy bilim va ko‘nikmalarni egallab, o‘zining katta maqsadlar bilan yashayotganini namoyon etmoqda. Bu — Mirobodning intellektual salohiyati, ertangi kuniga bo‘lgan ishonchidir.

Ayni paytda tumanimizda yoshlarni IT, sun’iy intellekt, dasturlash, raqamli texnologiyalar va mehnat bozorida talab yuqori bo‘lgan kasblarga o‘qitishga alohida e’tibor qaratilmoqda. Chunki bugungi bitiruvchi ertangi kunda nafaqat yaxshi mutaxassis, balki Yangi O‘zbekiston taraqqiyotini oldinga siljitadigan kuch bo‘lishi kerak.

Aziz yoshlar!

Orangizdan kelajakning yetuk pedagoglari, shifokorlari, muhandislari, olimlari, dasturchilari, tarjimonlari, tadbirkorlari yetishib chiqishiga ishonamiz. Balki bugun orangizda o‘tirgan kimdir ertaga yangi texnologiya yaratadi, kimdir minglab insonlarga ta’lim beradi, yana kimdir Vatanimiz sharafini xalqaro maydonlarda yuksaklarga olib chiqadi.
 

Buning uchun esa bir narsa zarur — to‘xtamaslik.

Kitobni hayotingizning eng yaqin hamrohiga aylantiring. Xorijiy tillarni o‘rganishdan, yangi bilim va texnologiyalarni egallashdan hech qachon to‘xtamang. Zamon bilan hamnafas yashang, doimo izlaning va o‘z ustingizda ishlang. Eng muhimi, katta maqsadlar qo‘yishdan qo‘rqmang. Chunki insonning ertangi yutug‘i — uning bugungi intilishi, mehnati va bilimga bo‘lgan chanqoqligi bilan belgilanadi.

Eng muhimi, sizlarga ishonayotgan ota-ona, ustoz va Vatan ishonchini oqlang. Inson uchun bundan ortiq sharaf yo‘q.
 

Sizlar — Mirobodning g‘ururi, Yangi O‘zbekistonning ishonchli kelajagisiz.

Barchangizga mustahkam sog‘liq, omad, ulkan yutuq va baxt tilayman.

Yo‘lingiz doimo ochiq, qalbingizdagi orzular esa yuksak bo‘lsin.