Toshkent shahar Mirobod tumani hokimligi

Tashrif davomida suzish havzasi direktori Timur Shatursunov tomonidan majmua imkoniyatlari, texnik jihatlari va fuqarolar uchun yaratilgan shart-sharoitlar haqida taqdimot o‘tkazildi.

Basseyn zamonaviy talablar asosida jihozlangan bo‘lib, uning chuqurligi 1,6–1,8 metr, uzunligi esa 25 metrni tashkil etadi. Havza avtomatik suv tozalash tizimi bilan ta’minlangan bo‘lib, suv harorati doimiy ravishda 26–28 darajada ushlab turiladi. Shuningdek, majmuada bir vaqtning o‘zida 80 nafargacha fuqaro mashg‘ulot o‘tkazishi mumkin.

Majmua barcha toifadagi aholi uchun mo‘ljallangan bo‘lib, nogironligi bo‘lgan shaxslar uchun ham to‘siqlarsiz muhit yaratilgan. Bu esa inklyuzivlik tamoyillari asosida har bir fuqaroning sport bilan shug‘ullanishi uchun keng imkoniyat yaratadi.

Basseyn binosining kirish qismida sanitar xonalar (hojatxona va dushlar), garderob, ma’muriyat xonasi hamda tibbiy xizmat ko‘rsatish uchun hamshira xonasi tashkil etilgan.

Loyiha O‘zbekiston Respublikasi Prezidentining suv sportini rivojlantirishga qaratilgan qarorlari doirasida amalga oshirilgan bo‘lib, mamlakatimizda sport infratuzilmasini yanada takomillashtirish va yoshlar o‘rtasida sog‘lom turmush tarzini shakllantirishga xizmat qiladi.

Majmua atrofi ham to‘liq obodonlashtirilgan: hududda maysazorlar yotqizilgan, dekorativ daraxt va butalar ekilgan, fuqarolar uchun qulay piyodalar yo‘laklari va avtomobillar to‘xtash joylari barpo etilgan.

Yangi sport majmuasi mahalla aholisi, ayniqsa yoshlar uchun sog‘lom turmush tarzini yuritish, bo‘sh vaqtni mazmunli o‘tkazish hamda sport bilan muntazam shug‘ullanishga xizmat qilayotgan muhim maskanlardan biriga aylanib bormoqda.