Mirobod tumanida KPI va ijro intizomi bo‘yicha iqtisodiy o‘qish bo‘lib o‘tdi
2026-02-17 14:45:00 / Yangiliklar
Yig‘ilishga tuman hokimi A.N. Sayfutdinov raislik qildi. Unda hokim o‘rinbosarlari, apparat rahbariyati, bo‘lim va boshqarma boshliqlari hamda tegishli tashkilotlar vakillari ishtirok etdi.
Asosiy masalalar muhokamasi
Kun tartibiga muvofiq, Toshkent shahar hokimligida 2026-yil 13-fevral kuni o‘tkazilgan 01-B-24-sonli bayonda belgilangan topshiriqlar ijrosi hamda 2026-yil I chorak uchun eng muhim samaradorlik ko‘rsatkichlari (KPI) yuzasidan vazifalar ko‘rib chiqildi.
Shuningdek, 2025-yil yakunlari va IV chorak natijalari tahlil qilinib, yo‘l qo‘yilgan kamchiliklar, mavjud zaxiralar hamda ustuvor yo‘nalishlar atroflicha muhokama etildi.
Yig‘ilishda quyidagi jihatlarga alohida e’tibor qaratildi:
- KPI ko‘rsatkichlariga o‘z vaqtida va sifatli erishish bo‘yicha shaxsiy javobgarlikni kuchaytirish;
- har oy yakunida oylik ish rejalarini tasdiqlash va amalga oshirish;
- haftalik yig‘ilishlarda maqsadli ko‘rsatkichlarga erishish holatini tanqidiy muhokama qilib borish;
- hujjatlar bilan ishlash jarayonida intizomni mustahkamlash va byurokratik kechikishlarning oldini olish.
Iqtisodiy o‘qishlar va nazorat mexanizmi
2026-yil yanvar–fevral oylariga mo‘ljallangan iqtisodiy o‘quvlar reja-grafigi ijrosi doirasida rahbar va mas’ul xodimlar tomonidan KPI tizimi asosida tayyorlangan shaxsiy referatlar ko‘rib chiqildi.
Tuman hokimi tomonidan har bir yo‘nalish kesimida aniq topshiriqlar berilib, belgilangan ko‘rsatkichlarga erishish har bir rahbarning bevosita mas’uliyati ekani ta’kidlandi.
Yig‘ilish yakunida berilgan topshiriqlar ijrosini qat’iy nazorat qilish tuman hokimining o‘rinbosarlari hamda Tahliliy–nazorat guruhi zimmasiga yuklatildi.
Mazkur yig‘ilish boshqaruv tizimida samaradorlikni oshirish, ijro intizomini kuchaytirish va natijadorlikni ta’minlashga xizmat qilishi qayd etildi.