Korrupsiyaga murosasizlik, halollik va shaffoflik — davlat xizmatchilarining ustuvor burchi
2026-02-16 16:15:00 / Yangiliklar
"Korrupsiya — davlat taraqqiyotiga to‘siq bo‘ladigan, adolat va qonun ustuvorligini izdan chiqaradigan, jamiyatda ishonch muhitini zaiflashtiradigan eng jiddiy tahdid. Korrupsiyaga yo‘l qo‘yish esa islohotlarimizga xiyonatdir! Bu illatga qarshi kurashish bo‘yicha 2026-yilda "favqulodda holat" e’lon qilamiz!"
— Shavkat Mirziyoyev, O‘zbekiston Respublikasi Prezidenti
Mirobod tumani hokimligida Toshkent shahar hokimining komplayens va korrupsiyaga qarshi ichki nazorat bo‘yicha o‘rinbosari Mirmuhammad Mirshahidovich Mirxamidov, Toshkent shahar hokimligining Komplayens va korrupsiyaga qarshi ichki nazorat xizmati boshlig‘i Shuhrat Xudoyqulovich Turdiqulov hamda Mirobod tumani hokimi Anvar Nazarovich Sayfutdinov ishtirokida korrupsiyaga qarshi kurashish, manfaatlar to‘qnashuvining oldini olish hamda davlat xizmatchilari faoliyatida ochiqlik va shaffoflikni ta’minlash masalalariga bag‘ishlangan seminar tashkil etildi.
Yig‘ilish davomida ishtirokchilarga:
– “Korrupsiyaga qarshi kurashish to‘g‘risida”gi,
– “Manfaatlar to‘qnashuvi to‘g‘risida”gi,
– “Davlat fuqarolik xizmati to‘g‘risida”gi qonunlar,
– Vazirlar Mahkamasining 595-son qarori mazmun-mohiyati yuzasidan batafsil tushuntirishlar berildi.
Tadbir davomida korrupsion xavflarni barvaqt aniqlash, manfaatlar to‘qnashuvini bartaraf etish va davlat xizmatchilari faoliyatida halollik tamoyillarini mustahkamlash yuzasidan amaliy tavsiyalar bildirildi.
Yig‘ilishda ijro intizomi, ichki tartibni mustahkamlash, har bir xodim o‘z faoliyatiga tanqidiy yondashib, xulosa chiqarishi lozimligi alohida ta’kidlandi. Fuqarolar murojaatlariga o‘z vaqtida va sifatli javob berish davlat xizmatchisining eng ustuvor vazifasi ekani qayd etildi.
Tuman hokimi ta’biri bilan aytganda: “Kichik xato — ertaga kelajakka bolta uradi.”
Seminar yakunida barcha rahbar va xodimlardan qonun ustuvorligini ta’minlash, shaxsiy mas’uliyatni kuchaytirish hamda har qanday korrupsion holatlarga nisbatan murosasiz munosabatda bo‘lish talab etildi. Zero, adolat va halollik tamoyillari qaror topgan jamiyatdagina barqaror taraqqiyot ta’minlanadi.