Toshkent shahar Mirobod tumani hokimligi

Qadrli Mirobod tumani aholisi, aziz yurtdoshlar!

Yangi — 2026-yil ostonasida turib, sizlarni shu qutlug‘ ayyom bilan samimiy muborakbod etar ekanman, faxr bilan ta’kidlab o‘tmoqchiman: Mirobod bugun yangilanayotgan Toshkentning, taraqqiyotga intilgan Yangi O‘zbekistonning yorqin qiyofasidir. Ortimizda qolib borayotgan yil tumanimiz hayotida tasodifiy o‘zgarishlar emas, balki puxta o‘ylangan islohotlar, qat’iy qarorlar va xalq manfaatiga xizmat qilgan amaliy ishlar yili sifatida tarixga muhrlanmoqda.

Muhtaram Prezidentimiz Shavkat Miromonovich Mirziyoyev tomonidan ilgari surilgan “Inson qadri uchun” degan ulug‘ g‘oya Mirobodda shior emas, balki hayot tarziga aylandi. Bu g‘oya obod ko‘chalarda, yangilangan mahallalarda, ta’lim va texnologiyaga ochilgan eshiklarda, eng muhimi — odamlarning ertangi kunga bo‘lgan ishonchli qarashlarida o‘z ifodasini topmoqda.

Yurtimizda 2026-yilning “Mahallani rivojlantirish va jamiyatni yuksaltirish yili” deb e’lon qilinishi Mirobod uchun alohida ma’no kasb etadi. Chunki mahalla — bu inson taqdiri, jamiyat ma’naviyati va taraqqiyotning ildizidir. Tumanimizdagi 39 ta mahallada olib borilayotgan keng ko‘lamli ishlar ana shu haqiqatdan oziqlanadi. Joriy yilda “Ziyonur”, “Tolariq” va “A.Avloniy” mahallalarida amalga oshirilgan obodonlashtirish va ta’mirlash ishlari Mirobodda yashash nafaqat qulay, balki faxrli ekanini yana bir bor namoyon etdi.

Bu natijalar kechagi kun bilan cheklanib qolmaydi. Prezidentimizning PF–223-sonli Farmoni asosida ishlab chiqilgan Mirobod tumanini 2026-yilda kompleks ijtimoiy-iqtisodiy rivojlantirish dasturi tumanimizni mutlaqo yangi bosqichga olib chiqishga qaratilgan. Ushbu dastur iqtisodiy o‘sishni inson hayotida his etiladigan darajaga olib chiqish, aholi bandligi va daromadlarini oshirish, tadbirkorlikni qo‘llab-quvvatlash, yashil tamoyillarni hayotimizga singdirish orqali Mirobodni barqaror taraqqiyot hududiga aylantirishni maqsad qilgan.

Dastur doirasida tuman markazi qiyofasi zamonaviy shaharsozlik talablari asosida qayta shakllanadi, oqova suv tarmoqlari bosqichma-bosqich barpo etiladi, yashil hududlar kengaytiriladi. Xizmat ko‘rsatish sohasida esa Mirobod yangi standartlarni belgilaydi: yo‘l bo‘yi infratuzilmasi, 24/7 rejimida faoliyat yurituvchi gastronomik va ko‘ngilochar ko‘chalar, iqtisodiy faollik va shahar madaniyati uyg‘unlashgan yangi muhit yaratiladi. Mavjud sanoat korxonalarining quvvati oshirilib, minglab yangi ish o‘rinlari yaratiladi.

Yoshlar — Mirobod tumani kelajagining asosiy tayanchi. Shu ma’noda, joriy yilda tumanimizda zamonaviy robototexnika va muhandislik markazining ish boshlashi oddiy ta’lim loyihasi emas, balki strategik qaror bo‘ldi. Ushbu markaz orqali ming nafardan ortiq yoshlar sun’iy intellekt, muhandislik, robototexnika, fizika va dron texnologiyalari bo‘yicha bilim olib, Mirobodni aql va innovatsiya makoniga aylantirmoqda.

Prezidentimiz raisligida 16-dekabr kuni bo‘lib o‘tgan yig‘ilish esa Mirobod taqdirida alohida burilish yasadi. Unda Toshkent shahri tumanlari aniq sohalar bo‘yicha ixtisoslashtirilar ekan, Mirobod tumani ilg‘or texnologiyalar, sun’iy intellekt, zamonaviy ta’lim va tibbiyot loyihalari jamlanadigan innovatsion markaz sifatida belgilab berildi. Bu qaror — tumanimizga berilgan eng yuksak ishonch, eng katta imkoniyat va eng katta mas’uliyatdir.

Aziz yurtdoshlar!

Yangi yil — bu faqat sana almashishi emas. Bu — yangi reja, yangi sur’at, yangi yutuqlar demak. Agar biz shu birlik, shu ishonch, shu fidoyilik bilan harakat qilsak, 2026-yil Mirobod uchun taraqqiyot ramzi, farovonlik mezoni va yuksalish timsoliga aylanadi.

Shu qutlug‘ damlarda sizlarga mustahkam sog‘lik, xonadonlaringizga tinchlik va baraka, farzandlarimizga porloq kelajak tilayman. Yangi yil har bir mahallaga obodlik, har bir oilaga quvonch, har bir yurakka ishonch olib kirsin.

Yaqinlashib kelayotgan yangi 2026-yil muborak bo‘lsin!

Mirobod — taraqqiyotga yetaklovchi tuman bo‘lib qolaversin!