Toshkent shahar Mirobod tumani hokimligi

Bugun, 22 dekabr kuni Mirobod tumani hokimligi katta majlislar zalida tumanda qish mavsumini betalofat o‘tkazish, mahallalarda yuzaga kelayotgan muammoli holatlar va ularning yechimlariga bag‘ishlangan kengaytirilgan yig‘ilish bo‘lib o‘tdi.

Yig‘ilish Mirobod tumani hokimining o‘rinbosari Farhod Najmiddinov raisligida o‘tkazilib, unda mahallalarga xizmat ko‘rsatuvchi boshqaruv servis kompaniyalari rahbarlari, tumandagi barcha kommunal tashkilotlar rahbarlari, shuningdek, hokimlikning tegishli yo‘nalish rahbarlari ishtirok etdi.

Tadbir avvalida F.Najmiddinov tumanda qish mavsumiga tayyorgarlik holati hamda joylarda mavjud muammolarga alohida to‘xtalib o‘tdi. Xususan, so‘nggi kunlarda yog‘gan qor yog‘ingarchiligi oqibatida mahallalarda olib borilgan qordan tozalash hamda qum-tuz aralashmasini sepish ishlari jarayonida ayrim boshqaruv servis kompaniyalari tomonidan yetarli darajada kuch va vositalar safarbar etilmagani, aholi xavfsizligini ta’minlash bo‘yicha berilgan topshiriqlarga sovuqqonlik bilan yondashilgani tanqidiy qayd etildi.

— Bunday murakkab ob-havo sharoitida barcha mutasaddi tashkilotlar hokimlik bilan hamkorlikda mavjud holatni qat’iy nazoratga olishi, aholi xavfsizligini ta’minlash bo‘yicha zarur choralarni o‘z vaqtida ko‘rishi shart. Fuqarolardan kelib tushayotgan murojaatlar ijrosi qat’iy nazoratga olinadi, beparvolikka yo‘l qo‘ygan mas’ullarga nisbatan tegishli choralar ko‘riladi, — dedi hokim o‘rinbosari.

Yig‘ilish davomida qish mavsumini o‘tkazish jarayonida vujudga kelayotgan muammolarni muntazam tahlil qilish, aniqlangan kamchiliklarni tezkor bartaraf etish bo‘yicha tuman hokimligi huzurida tashkil etilgan tezkor shtab faoliyatiga alohida e’tibor qaratildi. Qayd etilganidek, ayni paytda aholidan kelib tushayotgan murojaatlarni qabul qilish, ro‘yxatga olish va ularni tezkor hal etish maqsadida shtab faoliyat olib bormoqda. Tegishli kommunal tashkilotlar vakillari ushbu shtabga mas’ul qilib biriktirilgan.

Shuningdek, yig‘ilishda boshqaruv servis kompaniyalari rahbarlarining qish mavsumiga tayyorgarlik holati, mavjud muammolar va ularni bartaraf etish bo‘yicha ko‘rilayotgan chora-tadbirlarga doir hisobotlari tinglandi.

F.Najmiddinov taqdim etilgan ma’lumotlarni tahlil qilib, har bir muammoni joyiga chiqqan holda o‘rganish, ularni qisqa muddatlarda hal etish bo‘yicha tegishli mutasaddilarga aniq topshiriqlar berdi.

Yig‘ilish yakunida qish mavsumi bilan bog‘liq masalalar yuzasidan ijtimoiy tarmoqlar orqali kelib tushayotgan murojaatlarning o‘z vaqtida ko‘rib chiqilishi va ijrosi ta’minlanishi bo‘yicha mas’ullarga qator tavsiyalar berildi.