Mirobod tumani hokimi va prokurori migratsiyadagi yoshlarning taklif va muammolarini tingladilar
2025-12-03 08:05:00 / Yangiliklar
Yoshlar bu – har bir davlatning strategik resursi, kelajak taraqqiyoti va barqarorligini ta’minlovchi asosiy inson kapitali. Ularning xorijdagi ta’lim va mehnat faoliyatini qo‘llab-quvvatlash, huquq va manfaatlarini himoya qilish hamda olingan bilim va tajribani Vatanga olib qaytish O‘zbekistonning migratsiya siyosatida alohida ahamiyatga ega. Bu siyosat yoshlarning malakasini oshirish, ularni xalqaro bozorda raqobatbardosh qilish va mamlakat taraqqiyotiga samarali hissa qo‘shishga qaratilgan.
Shu munosabat bilan, 2-dekabr kuni, Mirobod tumani hokimi Anvar Sayfutdinov va tuman prokurori Bobur Abdullayev tomonidan migratsiyadagi yoshlar bilan onlayn-muloqot tashkil etildi.
Uchrashuvda tuman hokimi o‘rinbosari, yoshlar yetakchilari va tuman bandlik bo‘limi vakillari ishtirok etdilar.
Anvar Sayfutdinov yoshlarga murojaatini shunday boshladi:
“Har bir yosh – bu Vatanimiz kelajagi. Siz, aziz yoshlarga, har tomonlama ko‘mak berishni, xorijdagi faoliyatingizda yuzaga keladigan muammolarni tinglab, amaliy yechimlar topishni o‘zimizga ustuvor vazifa sifatida belgilab olganmiz. Migratsiya – faqat ishlash yoki ta’lim emas, balki bilim va tajriba bilan yurtga qaytish, o‘z mahallangiz, jonajon Vatanimiz taraqqiyotiga hissa qo‘shish demakdir. Umid qilamanki, har biringiz ushbu oddiy haqiqatni chuqur his etib, kelajakda yurtimiz uchun munosib fidoyi insonlar sifatida xizmat qilasizlar”
Muloqotda xorijda ta’lim olayotgan va mehnat qilayotgan yoshlarning takliflari, ish sharoitlari, mehnat haqi va boshqa muhim masalalar tinglandi. Ko‘tarilgan masalalar hokim tomonidan sinchkovlik bilan o‘rganilib, amaliy choralar ko‘rish uchun mas’ullarga topshiriqlar berildi.
Bu uchrashuv – O‘zbekistonning migratsiya siyosati doirasida yoshlarga berilgan e’tibor va ularning huquqlarini himoya qilish, shuningdek, vatandoshlarimiz uchun qulay shart-sharoitlar yaratishga qaratilgan muhim qadamdir.