Toshkent shahar Mirobod tumani hokimligi

Memorandum Toshkent transport texnikumida kasbiy ta’lim sifati va samaradorligini oshirish, yoshlar bandligini ta’minlash hamda mahalliy korxonalar bilan yaqin hamkorlikni mustahkamlash maqsadida tuzildi.

Tadbirda Transport texnikumi direktori Jamshid To‘ychiyev, Mirobod tumani hokimining o‘rinbosari Saidrasul Saidxanov, tuman maktabgacha va maktab ta’limi bo‘limi vakillari hamda texnikum o‘qituvchilari va talabalari ishtirok etdilar.

"Bu hamkorlik yoshlarimiz uchun yangi imkoniyatlar eshigini ochadi. Texnikum va mahalliy korxonalar o‘rtasidagi yaqin aloqalar bitiruvchilarni ish bilan ta’minlash va ularning kasbiy malakasini yuksaltirishda muhim ahamiyatga ega. Zero, zamonaviy kasb-hunarni egallagan, texnik bilimga ega yoshlar – Mirobod tumanining lokomotivi deb bilaman va ularni doimo qo‘llab-quvvatlashga tayyorman”, - deya ta’kidladi uchrashuv davomida tuman hokimi A.Sayfutdinov.

Transport texnikumi direktori J.To‘ychiyev esa hokimga texnikum talabalarining Germaniyada tahsil olishlari bo‘yicha ko‘rilayotgan chora-tadbirlar, shuningdek dual ta’lim va mahalliy korxonalar bilan hamkorlik ishlari haqida batafsil ma’lumot berdi.

Memorandum doirasida quyidagi ustuvor yo‘nalishlar amalga oshiriladi:

• Texnikum o‘quv dasturlari mahalliy korxonalar talablariga moslashtiriladi;
• Dual ta’lim va ishlab chiqarish amaliyoti kengaytiriladi;
• Pedagoglar malakasi oshiriladi;
• Xotin-qizlar va yoshlar uchun qisqa muddatli kasbga o‘qitish kurslari tashkil qilinadi;
• Texnikumning moddiy-texnika bazasi mustahkamlanadi.

Tomonlar memorandum asosida hududdagi korxonalar bilan yaqin hamkorlikni yo‘lga qo‘yib, bitiruvchilarni ish bilan ta’minlash va raqamli boshqaruv tizimini joriy etishni rejalashtirmoqda.

Memorandumning imzolanishi Mirobod tumanidagi kasbiy ta’lim tizimini yanada modernizatsiya qilish, yoshlar uchun zamonaviy imkoniyatlar yaratish va kasbiy ta’limni rivojlantirish borasida poytaxtda ilg‘or tajriba namunasini yaratish uchun asos bo‘ldi