Toshkent shahar Mirobod tumani hokimligi

Ma’lumki, 2025-yil iyun oyida Mirobod tumani hokimi Anvar Sayfutdinov tomonidan “Jasorat maktabi”ning moddiy-texnika bazasini yangilash va zamonaviy infratuzilma yaratish maqsadida 500 million so‘m mablag‘ ajratilgan edi. Ushbu mablag‘ doirasida ta’lim maskanida quyidagi maxsus mashg‘ulot zonalari barpo etildi:

• o‘q otish tiri,
• to‘siqlar yo‘lagi,
• gimnastika shaharchasi,
• vorkaut (sport) maydonchasi.

Shuningdek, “Jasorat sinflari” uchun zarur bo‘lgan barcha jihozlar to‘liq yangilanib, o‘quvchilar hozirgi talablarga mos sharoitda ta’lim va mashg‘ulot olish imkoniyatiga ega bo‘ldilar.

Yurtboshimizning 2024-yil 15-noyabrdagi PQ-393-son qarori asosida 214-maktab “Jasorat maktabi” sifatida belgilangan. Mazkur loyiha doirasida o‘quvchilar uchun 26 ta kvota ajratilgan.

Jasorat sinflarining asosiy yo‘nalishlari

“Jasorat maktabi” o‘quvchi-yoshlarda harbiy-vatanparvarlik tuyg‘usini mustahkamlash, intellektual, jismoniy va ma’naviy rivojlanishni ta’minlashga qaratilgan. Sinflar faoliyati doirasida quyidagi vazifalar ijro etiladi:

• harbiy-sport musobaqalari, intellektual viktorinalar va ko‘rik-tanlovlarni muntazam o‘tkazish;
• robototexnika, “Kelajak o‘yinlari”, tibbiy tayyorgarlik, huquqiy savodxonlik va milliy sport turlari bo‘yicha to‘garaklarga o‘quvchilarni jalb etish;
• o‘quvchilarda milliy qadriyatlarga hurmat, vatanparvarlik, sadoqat, halollik va milliy g‘urur tuyg‘ularini shakllantirish;
• yoshlarni mamlakatimiz tarixi, buyuk ajdodlarimiz merosi va milliy qahramonlar jasorati asosida faol fuqarolik pozitsiyasiga ega shaxslar sifatida tarbiyalash.

Yaratilgan zamonaviy shart-sharoit – yoshlar kelajagi yo‘lida xizmat qiladi

Yangilangan “Jasorat maktabi” o‘zining zamonaviy infratuzilmasi, harbiy-amaliy mashg‘ulotlar uchun moslashtirilgan maxsus maydonlari va innovatsion ta’lim yondashuvi bilan yoshlarning intellektual, jismoniy va ma’naviy salohiyatini yanada yuksaltirishga xizmat qiladi. Loyihadan ko‘zlangan maqsad — Vatanga sodiq, intizomli, irodali va mas’uliyatli yoshlarni tarbiyalab yetishtirishdir.

Tantanali marosim doirasidagi chiqishlar

Tadbirda o‘quvchilar va maktab jamoasi tomonidan tayyorlangan mazmunli madaniy-amaliy dastur namoyish etildi. Jumladan:

1. Faxriy qorovullar chiqishi,
2. 154-maktab o‘quvchilari tomonidan “Jadidlar” qo‘shig‘i ijrosi,
3. qo‘l jangi bo‘yicha namoyish mashg‘ulotlari,
4. 158-maktab raqs jamoasining chiqishlari.

Tadbir ishtirokchilari “Jasorat maktabi”ning ahamiyati, yaratilgan imkoniyatlar va loyihaning kelgusi bosqichlari yuzasidan o‘z fikr va mulohazalarini bildirdilar.