2025-yil 1-yanvar sanasidan e’tiboran, Rossiya Federatsiyasi Prezidentining 2024-yil 30-dekabrda qabul qilingan № 1126-sonli Farmoniga muvofiq , vizasiz tartib joriy qilingan davlatlarning fuqarolariga xususan, O‘zbekiston fuqarolari uchun
2025-yil 30-aprelga qadar huquqiy maqomlarini tartibga solib, patent olish imkoniyati berildi.

Buning uchun Rossiya Federatsiyasida ishlash istagidagi chet el fuqarolari vakolatli organlar – Rossiya Federatsiyasi Ichki ishlar vazirligining “Pasport-viza xizmati” Davlat unitar korxonasi (Federalnoe gosudarstvennoe unitarnoe predpriyatie «Pasportno-vizovыy servis» Ministerstva vnutrennix del Rossiyskoy Federatsii) hududiy bo‘linmalari, shuningdek, Moskva shahri va Moskva viloyatida bo‘lib turganlar “Saxarovo” ko‘p tarmoqli migratsiya markaziga (Mnogofunksionalnыy migratsionnыy sentr “Saxarovo”MMS) bunday markazlar bo‘lmasa, Federal migratsiya xizmati hududiy boshqarmasiga (Federalnaya migratsionnaya slujba Rossii FMS Rossii)  murojaat qilib, o‘z maqomini qonuniylashtirishlari uchun ariza topshirishlari kerak.

I. BIRINChI QADAM.

Chet ellik fuqarolar Rossiya Federatsiyasi Ichki ishlar vazirligining “Nazorat qilinadigan shaxslar reestri”dan (https://mvd.rf/rkl?ysclid=m6t0efy7s8760331040) o‘zlarining huquqiy holatlarini tekshirishlari lozim.

Siz ro‘yhatda bo‘lsangiz, demak maqomingizni qonuniylashtirishingiz zarur.

II. IKKINChI QADAM.

Qonuniylashtirish maqsadida ariza topshirishdan oldin Rossiya Federatsiyasi qonunchiligiga muvofiq to‘lanishi lozim bo‘lgan majburiy to‘lovlar bo‘yicha qarzdorlik (soliqlar, jarimalar va h.k.) va ijro ishi bo‘yicha ochilgan jarimalar mavjud bo‘lmasligi lozim ( https://fssp.gov.ru/iss/ip/ ).

Qarzdorlik mavjud bo‘lsa, unda siz barcha qarzdorlikni to‘lashingiz kerak.

III. UChINChI QADAM.

Rossiya Federatsiyasi Ichki ishlar vazirligi huzuridagi “Pasport-viza xizmati” (FGUP «Pasportno-vizovыy servis» MVD Rossii) Davlat unitar korxonasining hududiy bo‘linmalari, shuningdek, Moskva shahri va Moskva viloyatida bo‘lib turganlar “Saxarovo” ko‘p tarmoqli migratsiya markaziga (Mnogofunksionalnыy migratsionnыy sentr MMS) bunday markazlar bo‘lmasa, Federal migratsiya xizmati hududiy boshqarmasiga (Federalnaya migratsionnaya slujba Rossii FMS Rossii):

1. Pasport.
2. Migratsiya kartasi (agar migratsiya kartasi yo‘q bo‘lsa, uning dublikatini olish uchun siz ro‘yxatdan o‘tgan hududdagi Rossiya Ichki ishlar vazirligining migratsiya Bosh boshqarmasining hududiy bo‘limiga murojaat qilib olishingiz mumkin)ni olib borasiz.

U yerda Siz tomoningizdan majburiy to‘lovlar bo‘yicha qarzdorligingiz yo‘qligi to‘g‘risidagi deklaratsiya tasdiqlab beriladi (deklaratsiya “Pasport-viza xizmati” Davlat unitar korxonasining hududiy bo‘linmasi tomonidan taqdim etiladi).

IV.TO‘RTINChI QADAM.

Qonuniylashtirish jarayoni va tartiblari:

1. Daktiloskopik (barmoq izi) ro‘yxatdan o‘tish va suratga tushish;

2. Tibbiy ko‘rikdan o‘tish;

3. Rus tili, Rossiya tarixi va qonunchiligi asoslari bo‘yicha imtihon topshirish (amaldagi sertifikat bo‘lsa topshirish talab etilmaydi);

4. ISP polisi (ixtiyoriy sug‘urta polisi) rasmiylashtiriladi;

5. Murojaat etilgan migratsiya xizmati tomonidan chet el fuqarosini Rossiya Federatsiyasida bo‘lish (yashash) tartibini buzganligi uchun ma’muriy javobgarlik to‘g‘risida bayonnoma rasmiylashtirilib, faqatgina jarima qo‘llaniladi (jarima miqdori fuqaroni turgan hududiga bog‘liq bo‘lib, 2 000 dan 7 000 rublgacha bo‘ladi). Bunda, ma’muriy chiqarib yuborish jazosi (deportatsiya) qo‘llanilmaydi (jarima to‘latish yuzasidan berilgan bayonnoma ma’muriy javobgarlikka olib kelmaydi).

V. BEShINChI QADAM.

Qonuniylashtirish bo‘yicha ariza qabul qilinganidan so‘ng Sizga maxsus ma’lumotnoma beriladi va Siz 7 ish kuni ichida Rossiya Ichki ishlar vazirligining hududiy organiga murojaat qilib, migratsiya hisobiga (registratsiya) qo‘yilishingiz kerak.

Ushbu ma’lumotnoma asosida chet el fuqarosiga yashash uchun joy taqdim etgan rossiyalik shaxs tomonidan 7 ish kunida Rossiya Ichki ishlar vazirligining hududiy organiga murojaat qilib, migratsiya hisobiga (registratsiya) qo‘yishi lozim.

Migratsiya hisobiga qo‘yish chet el fuqarosining huquqiy maqomini tartibga solish uchun majburiy talab hisoblanadi.

VI. OLTINChI QADAM.

Patent rasmiylashtirish jarayoni:

Patent rasmiylashtirish uchun ariza to‘ldiriladi. Bunda fuqaroga ariza qabul qilinganligi xaqida ma’lumotnoma beriladi.

Patentni olish uchun qo‘yidagi hujjatlarni taqdim etasiz:

1. Fuqarolik pasporti;

2. Migratsiya hisobiga qo‘yilganligi to‘g‘risidagi bildirishnoma (registratsiya qog‘ozi);

3. Daromad solig‘ini (patent) to‘laganlik haqida kvitansiya.

VII. YeTTINChI QADAM.

Patentni olganingizdan so‘ng qo‘yidagi talablarni bajarishingiz kerak:

1. Chet el fuqarosi 2 oy ichida Rossiya Ichki ishlar vazirligi hududiy organiga mehnat faoliyatini amalga oshirayotganligi haqida belgilangan tartibda xabar berishi;

2. Patent muddatini uzaytirish va Rossiya Federatsiyasi hududida qonuniy bo‘lish muddatini saqlab qolish uchun har oyda patent to‘lovini amalga oshirishi;

3. Chet el fuqarosi migratsiya hisobini (registratsiya) patent muddati davomida uzaytirib borishi kerak.

Agarda chet el fuqarosi huquqiy maqomini tartibga solish imkoniyatidan foydalanmasa, Rossiya Federatsiyasida noqonuniy ravishda qolishda davom etsa, u nazorat ostidagi shaxslar reestriga kiritiladi.

Bu unga nisbatan Federal qonun (25.07.2002 yil, №115-FZ) asosida ayrim huquq va erkinliklarni amalga oshirish bo‘yicha cheklovlar qo‘llanilishiga sabab bo‘ladi.

Jumladan, “Nazorat ostidagi shaxslar reestri” ga kiritilgan shaxslarga banklarda hisob raqam ochilmaydi, nikohni qayd etish va mol-mulk xarid qilish, tadbirkorlik bilan shug‘ullanishda cheklovlar o‘rnatiladi. Shuningdek, transport vositalarini boshqarish huquqini cheklash, transport vositalarini boshqarish huquqiga imtihon topshirishga ruxsat bermaslik, Rossiya milliy yoki xalqaro haydovchilik guvohnomasini berish, almashtirish yoki yangilashni rad etish ham belgilangan. Qolaversa, Rossiya Federatsiyasi hududida noqonuniy bo‘lib turgan xorijliklarning yosh bolalarini maktab va bolalar bog‘chalariga qabul qilish ham mumkin emas. E’tiborlisi, shu toifadagi shaxslarga xizmat ko‘rsatganlik uchun jarima qo‘llaniladi.

Mazkur reestrdagi chet el fuqarolarini Rossiya Federatsiyasidan ma’muriy tartibda chiqarib yuborish (vыdvorenie) huquqi, 2025 yil 5 fevraldan boshlab sud orqali emas, balki ichki ishlar organlariga (politsiya) ham berilganligini eslatib o‘tamiz.

         Agarda fuqaro avvalgi davrlarda Rossiyadan ma’muriy chiqarib yuborish haqida choralar, ishlash ruxsatnomasi (patent) berishni rad etuvchi asoslar mavjud bo‘lsa, bunday toifadagi chet el fuqarolariga ushbu farmon qo‘llanilmaydi.

Rossiya Federatsiyasida 3 oydan ortiq vaqt qolmoqchi bo‘lgan va vaqtincha mehnat faoliyatini olib borayotgan hamyurtlarimiz huquqiy maqomni tartibga solish (legalizatsiya) va patent rasmiylashtirish bilan bog‘liq savollari yuzasidan vakolatli organlarga shuningdek, O‘zbekiston Respublikasining Rossiya Federatsiyasidagi konsullik muassasalari va Migratsiya agentligining vakolatxonalariga murojaat qilishlari mumkin. (O‘zbekiston Respublikasining Rossiyadagi konsullik muassasalari va Migratsiya agentligi vakolatxonalari manzillari –xavola  https://t.me/uzmigration/277)

Muhim eslatma: Rossiya Federatsiyasida huquqiy maqomingizni qonuniylashtirish imkonini beruvchi mazkur tartib faqat
2025 yil 30 aprelga qadar joriy qilingan. Barcha tanishlaringiz bilan ulashing!