Toshkent shahar                                                                                                                  2024-yil, 16-avgust
Bugun Axborot va ommaviy kommunikatsiyalar agentligida Madaniyat vazirligining 2024-yil I yarim yillik faoliyati yakunlari hamda 2024-yilning II yarim yilligida mo‘ljallangan rejalari mavzusida matbuot anjumani o'tkazildi.

Unda, O‘zbekiston Respublikasi madaniyat vaziri Ozodbek Nazarbekov, vazir o‘rinbosarlari va vazirlikning markaziy apparati xodimlari qatnashishdi.

Matbuot anjumani avvalida madaniyat vaziri Ozodbek Nazarbekov so‘zga chiqib 2024 yilning birinchi yarim yilligida amalga oshirilgan ishlar yuzasidan umumiy hisobot berdi.

“Bugungi anjumanimiz shunchaki hisobot uchun emas, balki ochiq va samimiy ruhdagi muloqot shaklida o‘tishini istayman. Buni avvalgi uchrashuvlarimizda ham bir necha bor ta’kidlagandim. Hurmatli jurnalistlarimiz buni yaxshi bilishadi. Ya’ni, biz Madaniyat vazirligi o‘laroq, qolaversa, shaxsan o‘zim doimo ochiqlik tarafdori bo‘lib kelganman va bundan keyin ham shunday bo‘lib qoladi” – dedi vazir Ozodbek Nazarbekov nutqi avvalida.

Matbuot anjumani davomida Madaniyat vazirligi tomonidan 2024-yilning I yarim yilligida amalga oshirilgan ishlar va II yarim yillikda oldimizda turgan ustuvor vazifalar to‘g‘risida axborot berildi.

Teatr va sirk yo‘nalishida:

Teatrlarda 5 974 ta spektakl seanslari o‘tkazilib, ularga 1,8 mln nafar tomoshabin tashrif buyurdi.

2024-yilning o‘tgan davrida 80 ga yaqin spektakl sahnalashtirildi, shundan 10 tasi tarixiy, 35 tasi milliy, 26 tasi xorijiy sahna asarlaridir.

Birinchi yarim yillik davomida “O‘zbeksirk” tomonidan 254 ta seans o‘tkazildi. Ularning 213 tasi sirkda, 41 tasi ko‘chma namoyishlarda tashkil etildi. Ushbu tomoshalarga 50 mingdan ortiq tomoshabin tashrif buyurdi.

Konsert-tomosha yo‘nalishida:

2024-yilning birinchi yarim yilligida 3 236 ta ommaviy konsert-tomosha tadbiri tashkil etilib, ularga 5 mlnga yaqin aholi qamrab olindi.

O‘tgan davrda konsert-tomosha muassasalari ijodiy jamoalarning 228 ta mahalliy va 28 ta xorijiy gastrol safarlari tashkil etildi.

26 – 30-aprel kunlari Xiva shahrida “Lazgi” II xalqaro raqs festivali, 3-5 may kunlari Buxoro shahrida II “Xalqaro zardo‘zlik va zargarlik festivali”, may-iyun oylarida Namangan shahrida 63-Xalqaro gullar festivali, 27-30-iyun kunlari Zomin tumanida II Xalqaro maqom san’ati anjumani tashkil etildi.

Ta’lim muassasalari yo‘nalishida:

Madaniyat vazirligi tizimida jami 367 ta ta’lim muassasasi faoliyat olib bormoqda. Jumladan, 325 ta bolalar musiqa va san’at maktabi, 29 ta ixtisoslashtirilgan san’at va madaniyat maktabi va maktab-internatlari, 2 ta kollej, 5 ta oliy ta’lim muassasasi va ularning 4 ta filiali hamda 2 ta malaka oshirish markazlari mavjud.

Mazkur ta’lim muassasalarda 105 ming 703 nafar o‘quvchi-talabalarga 18 ming 683 nafar professor-o‘qituvchilar ta’lim berib kelmoqda.

Shuningdek, oliy ta’lim muassasalarida tahsil olayotgan 21 nafar talaba Davlat stipendiyalarini qo‘lga kiritdi va 2023-yilning mos davriga nisbatan 1,3 barobarga oshdi.

Ta’lim muassasalarida xalqaro hamkorlikni yo‘lga qo‘yish maqsadida 10 dan ziyod turdosh ta’lim muassasalari va tashkilotlar o‘rtasida ikki tomonlama hamkorlik shartnomalari tuzildi.

Xorijiy turdosh oliy ta’lim muassasalarining 5 nafar yetakchi professor-o‘qituvchisi jalb etilib, ular tomonidan dars mashg‘ulotlari tashkil qilindi hamda “Mahorat darslari” o‘tkazildi.

Oliy ta’lim muassasalarida faoliyat olib borayotgan professor-o‘qituvchilarning 22 nafari ilmiy daraja va ilmiy unvonga ega bo‘ldi.

Rejadagi bolalar musiqa va san’at maktablariga 7 turdagi milliy musiqa cholg‘ulari yetkazib berildi.

Madaniy faoliyat, nomoddiy madaniy meros va xalq ijodiyoti yo‘nalishida:

Bugungi kunda Madaniyat vazirligi tizimidagi 837 ta madaniyat markazida 4 171 ta to‘garak, studiya va badiiy havaskorlik jamoalari faoliyat olib bormoqda.

Tashkil etilgan to‘garak, studiya va badiiy havaskorlik jamoalariga 57,3 ming aholi, shu jumladan, 49,5 ming yoshlar qamrab olingan.

Ushbu muassasalar tomonidan 2024-yil birinchi yarim yilligida 26,8 mingta madaniy-ma’rifiy tadbir tashkil etildi.

 “O‘zbekiston kulolchilik maktablari”, “Iftor va u bilan bog‘liq ijtimoiy-madaniy an’analar”, “Naqqoshlik – kitob bezak san’ati” YUNESKOning Insoniyat nomoddiy madaniy merosi reprezentativ ro‘yxatiga kiritildi.

Vazirlik tizimidagi 146 ta ko‘zi ojizlar maxsus kutubxonasiga 97 ming nafar (42 mingdan ortig‘i ko‘zi ojiz va zaif ko‘ruvchilar) foydalanuvchi qamrab olingan.

O‘tgan davrda kutubxonalar fondi foydalanuvchilar qiziqishlaridan kelib chiqqan holda jami 2 849 taga boyitildi.

Yangi olingan adabiyotlarning 451 tasi Brayl shriftidagi, 524 tasi audio va 1 874 tasi bosma harfli kitoblarga to‘g‘ri keladi.

Ko‘zi ojizlar maxsus kutubxonasining ovoz yozish studiyasi hamda tipografiyasida 17 nomda audio hamda 20 nusxada Brayl shriftidagi kitoblar foydalanishga topshirildi.

Ijodkor yoshlar bilan ishlash yo‘nalishida:

Birinchi yarim yillikda 11 ta ko‘rik-tanlov, festival, anjumanlar va boshqa tadbirlar o‘tkazildi.

Ularda 3 852 ga yaqin ijodkor yoshlarning ishtiroki ta’minlanib, shundan 129 nafari g‘olib va sovrindor bo‘ldi.

Raqamlashtirish yo‘nalishida:

Vazirlik va tizimdagi 600 nafar rahbar va boshqaruv xodimlarining zamonaviy axborot texnologiyalaridan foydalanish hamda IT sohasidagi bilim va ko‘nikmalari oshirildi.

Sohada raqamlashtirishga mas’ul bo‘lgan 7 nafar xodim Xalqaro IT–sertifikatiga ega bo‘ldi.

Shuningdek, “Ko‘cha san’ati va musiqasi” loyihasi ishtirokchilari faoliyatini reyting asosida baholash va ularni rag‘batlantirish maqsadida stritart.uz platformasi yaratildi.

Aholi, xususan, yoshlarga milliy musiqa cholg‘ulari bo‘yicha dastlabki tushunchalarni beruvchi hamda ularni ijro etishga o‘rgatuvchi “Cholg‘u.uz” mobil ilovasi ishga tushirildi.

Davlat-xususiy sheriklik yo‘nalishida:

Madaniyat ob’yektlarini davlat-xususiy sheriklik asosida tashkil etish yuzasidan tashabbuskor investorlar bilan yanvar-iyul oylarida 5 ta loyiha bo‘yicha umumiy qiymati 41 mlrd so‘mlik DXSH Bitimlari imzolandi.

Millatlararo munosabatlar sohasida:

Millatlararo munosabatlar qo‘mitasi milliy madaniy markazlar va boshqa hamkor tashkilotlar bilan birgalikda jami 3 mingdan ortiq tadbirlar tashkil qildi.

Jumladan, 184 ta konferensiya, 605 ta davra suhbati, 256 ta seminar, 209 ta forum va festival, 555 ta tanlov va ko‘rgazma, 1 637 ta madaniy-ma’rifiy tadbir va 15 ta hisobot konferensiyasi o‘tkazildi.

30 iyul – Xalqlar do‘stligi kuni munosabati bilan 2024-yil 29-iyul – 4 avgust kunlari “Do‘stlik” festivali tashkil etildi.

Kinematografiya sohasida:

Davlat buyurtmasi asosida “Bahodir Yalangto‘sh”, “Xaus”, “Samuray”, “Uyga qaytish”, “Ofitser”, “Ishq va anduh”, “Odina” kabi 7 ta badiiy film yaratildi.

“Yangi O‘zbekiston kinosolnomasi”, “O‘zbekiston san’ati darg‘alari”, “O‘zbekiston kino san’ati ustalari” kabi turkumlarda 26 ta hujjatli film ishlab chiqildi.

Vazirlik va idoralar bilan hamkorlikda 5 ta film, xususan, Ichki ishlar vazirligi bilan “Hudud”, Yoshlar ishlari agentligi bilan “Uyga qaytish”, “Navoiy kon-metallurgiya kombinati” bilan “Vatan timsollari”, Surxondaryo viloyati hokimligi bilan “Yengilmas: Tokioga yo‘l” filmlarini yaratishda hamkorlik qilindi.

Shuningdek, Qirg‘iz Respublikasi ijodkorlari bilan hamkorlikda “Bir kuni Samarqandda”, Turkmaniston Respublikasining “Turkmanfilm” kinostudiyasi bilan birgalikda “Maxtumquli” filmi suratga olinmoqda.

Xalqaro hamkorlik yo‘nalishida:

Madaniyat va san’at sohasida xalqaro aloqalarni yanada rivojlantirish bo‘yicha ham bir qator ijobiy ishlar amalga oshirilmoqda.

Xususan, 20-26 yanvar kunlari Boku, 20-27 yanvar kunlari Pekin, 15-20 aprel kunlari Dushanbe, 9-12 iyul kunlari Tbilisi, 6-9 avgust kunlari Ostona shaharlarida “O‘zbekiston madaniyati kunlari” o‘tkazildi.

Shuningdek, 20-26 fevral kunlari Doha shahrida “O‘zbekiston madaniyati, hunarmandchiligi va turizmi” haftaligi hamda 5-11 iyun kunlari London shahrida “O‘zbekiston madaniyati va taomlari festivali” tashkil etildi.

Shu bilan birga, O‘zbekistonda 10-14 iyun kunlari “Ozarbayjon madaniyati kunlari”, 22-27 iyun kunlari “Mo‘g‘uliston madaniyati kunlari”, 18-22 iyul kunlari “Qirg‘iz Respublikasi madaniyat kunlari” tashkil etildi.

Koreya, Turkiya, Tojikiston, Belarus, Qozog‘iston Respublikalari hamda Rossiya Federatsiyasi kabi davlatlar bilan ikki tomonlama 2024-2026-yillarga mo‘ljallangan madaniy hamkorlik dasturlari va bayonnomalari imzolandi.

Matbuot anjumani davomida Madaniyat vazirligi tomonidan 2024-yil ikkinchi yarim yilligida rejalashtirilgan ustuvor vazifalar haqida ham ma’lumot berildi.

Qo‘shimcha ma’lumot uchun: 91 588 90 85