Ассалому алайкум, азиз ватандошлар!

Муҳтарам фахрийлар, қадрли ёшлар!

Мунис опа-сингиллар, ҳурматли меҳмонлар!

Сиз, азизларни, кўпмиллатли бутун халқимизни қадимий ва ҳамиша навқирон байрам – Наврўзи олам билан чин юракдан самимий муборакбод этаман.

Бу йилги Наврўз байрами “Наврўзни улуғлаш – инсонни улуғлашдир!” деган эзгу ғоя асосида нишонланаётгани бежизга эмас. Бугунги мунаввар кунни эл-у юртимиз билан тинч ва хотиржам кутиб олаётганимиз учун Яратганга чексиз шукроналар айтамиз.

Бу йилги туманимизда ўтаётган Наврўз байрами муқаддас рамазон ойининг сўнгги кунларида, унинг табаррук фазилатларига уйғун ҳолда ўтаётгани байрамга алоҳида руҳ, ўзгача файз ва қувонч бағишламоқда.

Қалбларимиз шодликка тўлган шундай барокатли кунларда юртимиз мўмин-мусулмонларини, бутун ислом умматини кириб келаётган ийди рамазон билан қутлаб, жамики пок ниятларимиз ижобат бўлишини тилайман.

Шундай шукуҳли ва улуғ кунлар барчамизга муборак бўлсин!

Қадрли дўстлар!

Сўнгги йилларда мамлакатимизда амалга оширилаётган кенг кўламли ислоҳотлар, барча соҳалардаги туб ўзгаришлар халқимиз ҳаётида янги имкониятлар эшигини очмоқда. Иқтисодиётни ривожлантириш, тадбиркорликни қўллаб-қувватлаш, янги иш ўринлари яратиш, ёшлар ва аёллар учун имкониятларни кенгайтириш борасида амалга оширилаётган ишлар ўз самарасини бермоқда.

Жумладан, кечагинда очилиши бўлиб ўтган Тошкентдаги Ислом цивилизацияси марказини қуриб фойдаланишга топширилгани мустақил Ўзбекистон тарихида энг катта бунёдкорлик иши бўлди десак муболиға бўлмайди. Ушбу марказ тарих, маданият ва ислом цивилизациясини ўрганиш ҳамда оммалаштириш соҳасида дунёдаги энг йирик мажмуалардан бирига айланди. 

Шу билан бир қаторда таълим, соғлиқни сақлаш, рақамли технологиялар, инфратузилмани ривожлантириш соҳаларидаги янгиланишлар юртимизнинг келажаги учун мустаҳкам пойдевор бўлиб хизмат қилмоқда. Ҳар бир фуқарога ўз салоҳиятини рўёбга чиқариш, муносиб меҳнат қилиш ва фаровон ҳаёт кечириш учун шароитлар яратилмоқда.

Ҳеч шубҳасиз, юксак бунёдкорлик руҳи Янги Ўзбекистонимизда амалга оширилаётган улкан ислоҳотлар ва жадал ўзгаришларнинг асл мазмуни ва эзгу ғояларига ҳамоҳангдир.

Бугун мамлакатимизда инсон қадрини улуғлаш, ижтимоий адолат тамойилларини мустаҳкамлаш, аҳоли даромадлари ва турмуш даражасини юксалтириш йўлида қатъий қадамлар қўймоқдамиз.

Хусусан, юртбошимиз томонларидан Косонсой туманини Янги Ўзбекистон қиёфасидаги туман деб эътироф этишлари, бунинг учун туманимизни ривожлантириш учун
100 млрд сўм ҳамда 2 та маҳалламизни ҳам инфратузилмасини яхшилашга 5 млрд сўмдан маблағ ажратиб берганларига Сиз азизлар номингиздан миннатдорчилик билдиришга ижозат бергайсиз.

Биргина рамазон ойида ҳурматли Президентимиз томонларидан “Рамазон – меҳр-мурувват ва саҳоват ойи” шиори остида эҳтиёжманд аҳолини давлат томонидан ижтимоий қўллаб-қувватлаш мақсадида тумандаги 5356 нафар оилаларга 3,6 млрд.сўм маблағ ажратилди.

Ўтган 2025 йил давомида туманимизда

- Саноат маҳсулотлари ишлаб чиқариш ҳажми
1.8 трлн.сўм ёки 2020 йилга нисбатан 5.4 мартага;

- Ялпи қишлоқ хўжалиги маҳсулотлари ишлаб чиқариш 2.3 трлн.сўм ёки 2.1 мартага;

- Инвестициялар 2.6 трлн.сўм ёки 5.3 мартага;

- 9 та инвестицион лойиҳалар доирасида жами 178,1 млн доллар хорижий инвестициялар ўзлаштирилиб, буни натижасида қарийб 2,5 мингта янги иш ўринларини яратилди.

- Қурилиш монтаж ишлари 679.7 млрд.сўм ёки
173 фоизга;

- Чакана савдо айланмаси 1.6 трлн.сўм ёки 2.4 мартага;

- Хизматлар кўрсатиш ҳажми 1.4 трлн.сўм ёки
2.8 мартага;

- Ташқи савдо айланмаси 135.8 млн.доллар ёки
2.5 мартага;

- экспорт ҳажми 95.8 млн.доллар ёки 4.9 мартага ўсишига эришилди. 

Наврўз кунларида бобо деҳқонларимиз ризқ-рўзимиз, дастурхонимиз қут-баракасини ўйлаб, она заминга ўз меҳрини беради, мўл ҳосил олиш ниятида қаттиқ бел боғлайди.

Кўнглимизда меҳнат ва ижод, уйғониш ва яшариш завқи тобора кучайиб бораётган мана шундай баҳорий лаҳзаларда миришкор деҳқон ва фермерларимиз, боғбон ва чорвадорларимизга алоҳида эҳтиром изҳор этамиз.

Қишлоқ хўжалиги йўналишида сўнги 5 йилда пахтачиликдаги ҳосилдорлик 23 центнердан 49 центнерга, ғаллачиликда эса 36 центнердан 78 центнерга ошишига эришилди.

Ижтимоий соҳа йўналишида 2017-2026 йиллар давомида жами 51 та таълим муассасалари, жумладан, 34 та умумтаълим мактаблари, 16 та мактабгача таълим ташкилотларида қурилиш-таъмирлаш ишлари амалга оширилган.

Шундан, 2 та мактаб, 7 та боғча янги қурилган, 25 та мактаб, 6 та боғча реконструкция қилинган бўлса, 7 та мактаб, 3 та боғча мукаммал таъмирланган.

Муҳтарам юртдошлар!

Наврўз – ёшлик ва шижоат айёмидир.

Ҳаётга катта орзу-умидлар билан кириб келаётган ёшларимиз Янги Ўзбекистоннинг илғор ва қудратли кучига айланиб бораётганига барчамиз гувоҳмиз.

Бугунги кунда туманимиз ёшлари спорт турларидан миллий терма жамоа сафида юртимиз байроғини кўтараётгани, хусусан футбол бўйича ёшлар, ўсмирлар ва миллий терма жамоаларда тўп сураётгани бизга фахр ва ғурур бағишлайди.

Илм-фан, маданият, адабиёт ва санъат соҳаларида ҳам туманимиз фарзандлари бизнинг ватанимизни дунёга тараннум этаётганлари қувонарли ҳолдир.  

Ёшларга шундай беқиёс имкониятларни яратиб бераётган муҳтарам президентимизга сиз азиз ёшлар лаббай деб Ватан байроғини кўтаришда чарчаманг деб қоламан.

Қаерда бўлманг, қайси соҳада ишламанг, миллий қадриятларимизга, ўзлигимизга, Ватанимизга муносиб ва содиқ бўлинг!

Ҳурматли байрам иштирокчилари!

Сиз азизларни яна бир муҳим йўналишга эътиборингизни қаратмоқчиман.

Мамлакатимизда амалга оширилаётган “Яшил макон” умуммиллий лойиҳаси нафақат табиатни асраш, балки келажак авлодга соғлом ва мусаффо муҳит қолдиришда муҳим аҳамият касб этмоқда. Маҳаллаларда амалга оширилаётган ободонлаштириш ишлари – бу шунчаки қурилиш ёки тозалик эмас, бу – одамларнинг кайфияти, турмуш даражаси ва эртанги кунга бўлган ишончини ошириш демакдир. Ҳар бир кўча, ҳар бир хонадон олди тоза ва тартибли бўлса, юртимиз чинакам гўзал ва файзли масканга айланади.

Бу боради туманимизда ҳам “Яшил макон” лойиҳаси доирасида 900 мингдан ортиқ мевали, 800 мингдан ортиқ манзарали кўчатлар экилди ва ушбу ишлар давом этмоқда.

Шу ўринда барчангизни “Яшил макон” лойиҳасида фаол иштирок этишга, ҳар йили камида бир неча туп дарахт экишга, уларни парваришлашга чақираман. Чунки экилган ҳар бир ниҳол – бу келажакка қўйилган мустаҳкам пойдевордир.

Муҳтарам ватандошлар! 

Шарқона Янги йилимиз қутлуғ келсин, дарёларимиз сувга, омборларимиз ҳосилга тўлсин!

Бунёдкор қурувчиларимиз, азиз ва мўтабар устоз-мураббийларимиз, фидойи шифокорларимиз, иқтисодиётимиз таянчи бўлган ғайратли тадбиркорларимиз, юртимиз посбонлари ҳамда келажак бунёдкорлари ҳамиша соғ-омон бўлсин!

Олдимизга қўйган баланд марралар ва улуғ режалар тўлиқ рўёбга чиқсин!

Ушбу унутилмас, дилбар лаҳзаларда сиз, азизларни, барча-барча юртдошларимизни Наврўз байрами билан яна бир бор қутлайман.

Ҳар бир хонадонга, бутун юртимизга тинчлик, бахту саодат ва файз-у барака тилайман!

Наврўзи олам муборак бўлсин!