Qashqadaryo viloyati Kitob tumani hokimligi

Assalomu alaykum!!!

Hurmatli brifing qatnashchilari, mamlakatimizda pensionerlarni ijtimoiy qo‘llab-quvvatlashni yanada kuchaytirish, qariyalar va keksa yoshdagilarga har tomonlama g‘amxo‘rlik qilish, fuqarolarning davlat pensiya ta’minoti tizimini takomillashtirish va sohada mavjud muammolarni bartaraf etish yuzasidan izchil chora-tadbirlar amalga oshirilmoqda.

Bu borada tumanimizda 32 127 ta pensiya oluvchilar mavjud bo‘lib, shundan:

• 27 361 nafari yoshga doir pensiya oluvchilar,

• 3 079 nafar nogironlik pensiyasi oluvchilar,

• 1 616 nafar B.Y.P. oluvchilarni tashkil etadi.

Shu jumladan tumanimizda:

• II-jahon urushi davrida mehnat frontida qatnashganlar — 35 nafar,

• Yakka yolg‘iz pensionerlar — 44 nafar,

• Chernobil qatnashchilari — 24 nafar (shundan nogironlar — 18 nafar),

• Boquvchisini yo‘qotganlar, yoshga doir pensiyaga o‘tkazilganlar — 3 nafar,

• 100 yoshga to‘lgan va 100 yoshdan oshgan pensionerlar — 6 nafar,

• Baynalminal jangchilar — 9 nafar,

• O‘zbekiston Respublikasi oldidagi alohida xizmatlari uchun ustama oluvchilar — 465 nafar.

Pensiya oluvchi fuqarolarimizga o‘rtacha 1 yillik 486,9 mlrd so‘m va o‘rtacha oylik 40,5 mlrd so‘m naqd va plastik kartalari orqali to‘lanib kelinmoqda. Bunda plastik karta orqali pensiya va kompensatsiya oluvchi fuqarolarimizga har oyning 1–4 sanasiga qadar bank plastik kartalariga pensiya pullari yuklanib beriladi. Har oyning 4–27 sanasiga qadar AT Xalq banki Yagona kassa markazi tomonidan tasdiqlangan reja-grafikka asosan tumanimiz mahallalarida naqd pul to‘lovlari muntazam amalga oshirib kelinmoqda.

2021-yil 4-mayda O‘zbekiston Respublikasi Prezidentining “Fuqarolarga davlat pensiyalarini tayinlash jarayonini soddalashtirish hamda pensiya va nafaqalarni yetkazish tizimini yanada takomillashtirish chora-tadbirlari to‘g‘risida”gi 5102-sonli Qarori qabul qilingan.

Qarorda davlat pensiyalarini hisoblash uchun zarur ma’lumotlar elektron bazasini shakllantirish, ushbu jarayonni soddalashtirish, fuqarolarning ovoragarchiliklarini bartaraf etish, pensiya va nafaqalarni yetkazib berish tizimini yanada takomillashtirish, shuningdek, mazkur yo‘nalishda sog‘lom raqobat muhiti va zamonaviy standartlarni joriy etish ko‘zda tutilgan.

2023-yil 1-yanvardan boshlab davlat pensiyalarini tayinlashda fuqarolardan mehnat staji, ish haqi, oliy ta’lim muassasalaridagi o‘qish hamda harbiy xizmat davri to‘g‘risidagi hujjatlarni talab qilish bekor qilingan. Bunda pensiyaga chiqish huquqi paydo bo‘lgan vaqtda ishlamaydigan fuqarolar uchun mehnat staji hamda harbiy xizmat davri to‘g‘risidagi ma’lumotlarni Kambag‘allikni qisqartirish va bandlik vazirligining tuman (shahar) bo‘limlariga murojaat qilish orqali “Yagona milliy mehnat tizimi” idoralararo dasturiy-apparat kompleksiga (YaMMT IDAK) kiritish xizmati joriy etilgan.

O‘zbekiston Respublikasi Prezidentining 2023-yil 31-oktabrdagi PQ–353-son Qaroriga muvofiq, 2025-yil 1-martdan boshlab pensiya yoshiga to‘lgan (erkaklar 60 yosh, ayollar 55 yosh) fuqarolarga yoshga doir pensiyani ularning alohida murojaatini talab etmagan holda “proaktiv” shaklda tayinlash tartibi joriy etildi.

Davlat pensiyalarini tayinlash YaMMT IDAKga kiritilgan elektron ma’lumotlar asosida amalga oshiriladi. Bunda, mehnat staji, ish haqi, oliy ta’lim muassasalaridagi o‘qish hamda harbiy xizmat davri to‘g‘risidagi ma’lumotlar Pensiya jamg‘armasi tomonidan elektron ma’lumotlar almashinuvi asosida olinadi.

2023-yil 1-yanvardan boshlab pensiyaga chiqish huquqi paydo bo‘lgan vaqtda ishlamaydigan fuqarolarning mehnat staji raqamlashtirilishi bo‘yicha Pensiya jamg‘armasi tomonidan barcha mahallalarda sayyor uchrashuvlar o‘tkazilib, tushuntirishlar berilgan hamda bukletlar tarqatilgan.

Masalan, 2025-yilning o‘tgan olti oy davomida 932 nafar fuqarodan proaktiv ariza kelib tushgan bo‘lsa, shundan 588 tasi (64 foizi) ish staji raqamlashtirilganligi sababli tayinlangan.

Ushbu holatni bartaraf etish, fuqarolarimizning ovoragarchiligiga yo‘l qo‘ymaslik maqsadida jarayonni amalga oshirishda keng jamoatchilikni jalb qilish, mahalla fuqarolar yig‘inlarining fuqarolar bilan tushuntirish ishlarini olib borishi ijobiy natija beradi.

2025-yil 26-iyunda O‘zbekiston Respublikasi Prezidentining “Iqtisodiyot va moliya vazirligi huzuridagi G‘aznachilik xizmati qo‘mitasi hamda byudjetdan tashqari pensiya jamg‘armasi tomonidan zamonaviy xizmatlarni joriy etish chora-tadbirlari to‘g‘risida”gi 105-sonli Farmoni qabul qilindi.

Farmonning 5-V bandiga asosan, fuqarolarning pensiyaga oid ma’lumotlarini to‘liq raqamlashtirish maqsadida: 2025-yil iyul–oktyabr oylarida hokim yordamchilari har bir mahalladagi “mahalla yettiligi” bilan birgalikda fuqarolarning mehnat daftarchasi ma’lumotlarini tuman (shahar) kambag‘allikni qisqartirish va bandlikka ko‘maklashish bo‘limlari orqali raqamlashtirish bo‘yicha targ‘ibot ishlarini amalga oshirish belgilangan.

Mahalla uyushmasining ma’lumotiga ko‘ra, tumanimizdagi mehnat yoshidagi fuqarolar soni 36 253 nafarni tashkil etib, ushbu fuqarolarning mehnat daftarchalari raqamlashtirilishi lozim.

Bunda birinchi navbatda mahalla fuqarolar yig‘inlari mavjud shakllangan ro‘yxatlarga asoslanib, muntazam targ‘ibot ishlarini olib borib, bandlik bo‘limi orqali ularning mehnat stajlarini raqamlashtirish choralari ko‘rilishi zarur.

Ushbu yo‘nalishda tizimli ish tashkil etish uchun fuqarolarning mehnat daftarchasidagi ma’lumotlarni “Yagona milliy mehnat tizimi”ga kiritishni tashkil etish sxemasi ishlab chiqilgan bo‘lib, tuman ishchi guruhi tuzilgan. Ishchi guruh rahbari — tuman hokimi birinchi o‘rinbosari bo‘lib, amalga oshirilgan ishlar yuzasidan muntazam muhokamalar o‘tkazib borilmoqda.

Shu fursatdan foydalanib tumanimizdagi fuqarolarimizga murojaat qilmoqchiman.

Hurmatli tumandoshlar! Sizning ertangi kelajakdagi pensiyaga bo‘lgan huquqingizga befarq bo‘lmasligingiz va o‘zingizdagi mavjud mehnat daftarchalaringizni tuman Kambag‘allikni qisqartirish va bandlik bo‘limiga murojaat qilgan holda raqamlashtirib qo‘yishingizni so‘raymiz.