Kitob tumanidagi “Qaynar” va “Bashir” qishloqlariga “Turizm qishlog‘i” maqomi berildi
2025-05-29 18:00:00 / Yangiliklar
Qashqadaryo viloyatining Kitob tumanida ichki turizm salohiyatini rivojlantirish yo‘lida muhim qadam tashlandi: “Qaynar” va “Bashir” qishloqlari rasmiy ravishda “Turizm qishlog‘i” maqomiga ega bo‘ldi.
Mazkur maqomni tasdiqlovchi sertifikatlar tegishli rasmiylar ishtirokida qishloq aholisiga tantanali tarzda topshirildi. Tadbirda Turizm qo‘mitasi, viloyat va tuman hokimliklari vakillari, mahalliy keng jamoatchilik hamda ommaviy axborot vositalari ishtirok etdilar.
Shuningdek, ichki turizm sohasida faoliyat yuritayotgan turoperatorlar, turagentlar, mehmonxonalar, xostellar, mehmon uylari egalari va boshqa turizm sohasi vakillari ham marosimga taklif etildi.
Tadbir doirasida mahalliy hunarmandlar tomonidan tayyorlangan milliy hunarmandchilik buyumlar ko‘rgazmasi, hamda mehmonlarga taqdim etilgan o‘zbek milliy taomlari barchada katta taassurot qoldirdi. Qolaversa, Kitob tuman madaniyat bo‘limi ijodkorlari hamda folklor jamoalarining sahna chiqishlari mehmonlarda alohida qiziqish uyg‘otdi. Mahalliy ohanglar, qadimiy raqslar va kuy-qo‘shiqlar tadbirga milliy ruh va samimiy kayfiyat olib keldi.An’anaviy qadriyatlar, mehmondo‘stlik va madaniy boyliklar uyg‘unligidagi ushbu qishloqlar endilikda turistlar uchun yanada jozibador maskanga aylanadi.
“Turizm qishlog‘i” maqomi nafaqat ushbu hududlar obro‘sini oshiradi, balki u yerda yashayotgan aholining bandligini ta’minlash, infratuzilmani rivojlantirish va iqtisodiy imkoniyatlarni kengaytirishga ham xizmat qiladi.