Kitob tumani hokimi Rustam Abdirasulovich Gafurovning O‘zbekiston Respublikasi Mustaqilligining 35 yilligi munosabati bilan tumandoshlarimizga bayram TABRIGI
2026-09-01 08:00:00 / Yangiliklar
Aziz kitobliklar, muhtaram mehmonlar!
Avvalo, sizlarni, sizlar orqali butun go‘zal va bag‘rikeng tumanimiz ahlini eng ulug‘, eng aziz ayyom – O‘zbekiston Respublikasi davlat mustaqilligining shonli 35 yillik to‘yi bilan chin qalbimdan samimiy muborakbod etaman.
Bugungi qutlug‘ kechada, mana shu muhtasham maydonda jam bo‘lgan barcha yurtdoshlarimizga o‘zimning yuksak hurmat va ehtiromimni bildiraman.
Qadrli do‘stlar, aziz Kitob ahli!
Bu yilgi istiqlol ayyomini jonajon Vatanimiz rahbarining qaroriga asosan «Yagona Vatan, yagona xalq bo‘lib, yangi hayot va kelajak yaratamiz!» degan ulug‘vor bosh g‘oya ostida katta shodu xurramlik bilan kutib olmoqdamiz.
Ushbu teran shior bugun har bir kitoblikning qalbiga ko‘chib, barchamizni yangi marralar sari birlashtirmoqda, ezgu maqsadlar yo‘lida yanada katta kuch-g‘ayrat bilan harakat qilishga undamoqda.
Muhtaram Prezidentimiz Shavkat Mirziyoyev rahnamoligida yurtimizda «Inson qadri uchun» degan olijanob tamoyil asosida keng ko‘lamli va tarixiy islohotlar izchil amalga oshirilmoqda.
Mana shu yangilanish va bunyodkorlik jarayonlarida Kitob tumani ham o‘zgacha chiroy ochib, viloyatimizda alohida o‘rin va mavqega ega bo‘lgan, iqtisodiy va ijtimoiy jihatdan jadal rivojlanayotgan zamonaviy hududlardan biriga aylanib bormoqda.
Bugun hayotimizning har bir jabhasida ko‘zga tashlanayotgan ijobiy o‘zgarishlar, obod bo‘layotgan mahallalar, bunyod etilayotgan zamonaviy inshootlar, ta’mirlanib, ravon va fayzli ko‘rinishga kelayotgan yo‘llar — bularning barchasi xalqimizning birdamligi, fidokorona mehnati va yagona maqsad sari intilishining amaliy samarasidir.
Biz tuman hokimligi va keng jamoatchilik bilan birgalikda xalqimiz farovonligi yo‘lidagi ustuvor vazifalarni belgilab, ijtimoiy soha, qishloq xo‘jaligi, tadbirkorlik, turizm va yoshlar siyosatida qator salmoqli natijalarga erishdik.
Avvalo, aholimizning yashash sharoitlarini yaxshilash, mahallalarimizni obod qilish va infratuzilmani rivojlantirish doimo e’tiborimiz markazida bo‘lib kelmoqda.
«Obod mahalla» va «Obod qishloq» dasturlari doirasida hududlarda keng ko‘lamli bunyodkorlik va obodonlashtirish ishlari amalga oshirildi.
Joriy yilning o‘zida tumanimizda ko‘plab ko‘p qavatli zamonaviy uy-joylar barpo etilib, aholimiz uchun yangi va qulay yashash sharoitlari yaratildi.
Ehtiyojmand oilalarni har tomonlama qo‘llab-quvvatlash, ularning ijtimoiy himoyasini kuchaytirish maqsadida ijtimoiy nafaqalar va moddiy yordam ko‘lami sezilarli darajada kengaytirildi.
Tumanimizdagi shifoxonalar, maktablar va maktabgacha ta’lim tashkilotlarini ta’mirlash, ularning moddiy-texnik bazasini mustahkamlash va zamonaviy jihozlar bilan ta’minlashga salmoqli mablag‘lar yo‘naltirildi.
Bu ishlarning barchasi, avvalo, inson qadrini ulug‘lash, xalqimiz uchun munosib turmush sharoitlarini yaratishdek ezgu maqsadga xizmat qilmoqda.
Aziz yurtdoshlar!
Tumanimiz iqtisodiyotining muhim tayanchi bo‘lgan qishloq xo‘jaligi sohasida ham fidokor dehqon va fermerlarimiz bu yil yuksak marralarni zabt etdilar.
Ayniqsa, rizq-ro‘zimiz manbai bo‘lgan g‘alla topshirish bo‘yicha shartnomaviy reja tumanimizda oshig‘i bilan bajarildi.
Davlatimiz xirmoniga mo‘l miqdorda sifatli don topshirilib, xalqimiz dasturxoni to‘kinligini ta’minlashga munosib hissa qo‘shildi.
Mana shu zafarli xirmonni yaratgan barcha dehqonlarimizga, fermerlarimizga, mexanizatorlar va klaster xodimlariga alohida tashakkur aytaman!
Shuningdek, meva-sabzavotchilik va uzumchilik yo‘nalishida katta maydonlarda yangi intensiv bog‘lar va zamonaviy issiqxonalar barpo etilib, sohaga ilg‘or texnologiyalar kirib kelmoqda.
Bu esa kelgusida qishloq xo‘jaligi mahsulotlari yetishtirish hajmini yanada oshirish, eksport salohiyatini kengaytirish va aholi bandligini ta’minlash uchun mustahkam zamin yaratadi.
Iqtisodiyotimizning muhim harakatlantiruvchi kuchi bo‘lgan xususiy sektor va kichik biznes vakillari uchun ham keng imkoniyatlar eshigi ochilmoqda.
Tumanimizda ko‘plab yangi kichik biznes subyektlari tashkil etilib, tadbirkorlik faoliyatini boshlash va kengaytirish istagidagi yurtdoshlarimizga zarur sharoitlar yaratildi.
Xotin-qizlar va yoshlar tadbirkorligini qo‘llab-quvvatlash dasturlari orqali mahallalarda salmoqli miqdorda imtiyozli kreditlar ajratildi.
Buning natijasida ko‘plab yangi va barqaror ish o‘rinlari yaratilib, aholi bandligini ta’minlash, oilalar daromadini oshirish va farovonligini yuksaltirish borasida muhim qadamlar tashlandi.
Tumanimizning betakror tabiati, musaffo tog‘lari, muqaddas qadamjolari hamda boy tarixiy va madaniy merosi bugungi kunda nafaqat yurtdoshlarimiz, balki xorijiy sayyohlarning ham e’tiborini tortmoqda.
«Yashil turizm» va ziyorat turizmini rivojlantirish borasidagi sa’y-harakatlarimiz natijasida hududimizda qator yangi mehmon uylari va sayyohlik maskanlari tashkil etilib, minglab mahalliy va xorijiy mehmonlarga xizmat ko‘rsatish imkoniyati yaratildi.
Bu esa yangi ish o‘rinlarini yaratish bilan birga, Kitob tumanining turistik salohiyati va jozibadorligini yanada oshirmoqda.
Qadrli yurtdoshlar!
Ertamiz egalari bo‘lgan yoshlarimizning intellektual va jismoniy salohiyatini oshirish, ularning bilim olishi, kasb-hunar egallashi va o‘z iqtidorini namoyon etishi uchun sharoit yaratish biz uchun hamisha muqaddas burchdir.
Bugun Kitob yoshlari o‘z bilimi, iqtidori, ilm-fan, sport va turli sohalardagi yutuqlari bilan barchamizga cheksiz faxr-iftixor bag‘ishlamoqda.
Joriy o‘quv yilida maktablarimizni tamomlagan ko‘plab bilimdon o‘g‘il-qizlarimiz o‘zlarining namunali xulqi va a’lo baholari bilan oltin va kumush medallarni qo‘lga kiritib, ustozlari hamda ota-onalari ishonchini oqladilar.
Bizni yanada quvontirgan jihati — tumanimizning ko‘plab tirishqoq va iqtidorli yoshlari hali maktab partasida o‘tirgan kezlaridayoq imtihonlardan muvaffaqiyatli o‘tib, muddatidan avval nufuzli oliy o‘quv yurtlari talabasi degan sharafli nomga sazovor bo‘ldilar.
Bu, avvalo, Kitob ta’lim tizimining, fidoyi ustozlarimizning, bilimga chanqoq yoshlarimizning ulkan g‘alabasidir!
Shu bilan birga, «Yoshlar daftari» orqali yuzlab yigit-qizlarimizga o‘z tadbirkorligini boshlashi va daromad manbaiga ega bo‘lishi uchun zarur asbob-uskunalar hamda subsidiyalar ajratildi.
Iqtidorli sportchilarimiz esa joriy yilda respublika va xalqaro miqyosdagi musobaqalarda ko‘plab oltin hamda kumush medallarni qo‘lga kiritib, tumanimiz dovrug‘ini yanada yuksaltirdilar.
Bunday yutuqlar ortida, albatta, yoshlarimizning tinimsiz mehnati, ustozlarimizning fidoyiligi va ota-onalarimizning ezgu tilaklari mujassam.
Aziz yurtdoshlar!
Mana shu go‘zal va muqaddas zaminda yashayotgan har bir insonning hayotidan rozi bo‘lib, baxtli va farovon kun kechirishi — bizning eng oliy maqsadimizdir.
Bugungi yutuqlarimiz ortida siz kabi mehnatsevar, olijanob, yurtiga sodiq va jonkuyar Kitob ahlining halol mehnati, yuksak birdamligi va Vatanga bo‘lgan cheksiz mehr-muhabbati turibdi.
Shu fursatdan foydalanib, barchangizga tumanimiz rivojiga qo‘shayotgan beqiyos hissangiz, bunyodkorlik va taraqqiyot yo‘lidagi fidokorona mehnatingiz uchun chin qalbimdan tashakkur aytaman.
Hurmatli yurtdoshlar!
Bugun biz erishayotgan har bir yutuq — Mustaqilligimiz bergan ulkan imkoniyatlarning, xalqimizning tinimsiz mehnati va birdamligining yorqin ifodasidir.
Ishonchim komil, oldimizda hali bundan-da ulkan marralar, yanada ezgu maqsadlar va buyuk rejalar turibdi.
Biz bir yoqadan bosh chiqarib, yagona maqsad sari hamjihatlik bilan harakat qilsak, aziz Kitobimizni yanada obod, farovon va taraqqiy topgan go‘zal maskanga aylantirishga albatta erishamiz!
Sizlarni yana bir bor O‘zbekiston Respublikasi davlat mustaqilligining 35 yillik qutlug‘ to‘yi bilan samimiy muborakbod etaman!
Xonadonlaringizga tinchlik-omonlik, oilaviy baxt, sihat-salomatlik, qut-baraka va fayz tilayman!
Yurtimiz tinch, osmonimiz musaffo, xalqimiz omon bo‘lsin!
Mustaqilligimiz abadiy bo‘lsin!
Yashasin ozod va obod O‘zbekiston!