Kitob tumani Fermerlari kengashi rayosati a’zolarining MUROJAATI
2026-06-12 10:00:00 / Yangiliklar
G‘ALLA O‘RIM-YIG‘IMINI UYUSHQOQLIK BILAN O‘TKAZIB, MO‘L HOSIL OLISHGA ERISHING VA DAVLATGA DON SOTISH MAJBURIYATLARINI UNUTMANG!
Kitob tumani Fermerlari kengashi rayosati a’zolarining MUROJAATI
Hurmatli fermerlar!
Mamlakatimizda lafzi halol dehqon va fermerlarning zahmatli mehnatlari evaziga dalalarda ulkan g‘alla hosili yaratildi.
Davlatimiz rahbari tomonidan qabul qilingan ko‘plab farmon va qarorlar Siz, aziz dehqon va fermerlarning qishloq xo‘jaligi mahsulotlarini yetishtirishdagi ulkan yutuqlaringizga mustahkam zamin yaratmoqda.
Ayni paytda respublikamizning ko‘plab tumanlaridagi fermer xo‘jaliklari g‘alla o‘rim-yig‘imini uyushqoqlik bilan olib borib, davlat zaxirasiga ortig‘i bilan don topshirmoqda va yetishtirilgan mo‘l hosil evaziga katta daromadga ega bo‘lmoqda.
Masalan, Kitob tumanidagi ko‘plab g‘allachilik fermer xo‘jaliklari hozirning o‘zidayoq har gektar maydondan 100–110 sentnerdan oshirib, yuksak xirmon ko‘tarishga erishdilar. Shu tumandagi 20 ta fermer xo‘jaligi 110–130 sentnerdan ortiq hosil olgani tahsinga loyiqdir.
Jumladan, “Asilbek Abdinazar o‘g‘li” fermer xo‘jaligi joriy mavsumda 27 gektar maydonda yetishtirilgan g‘alladan har bir gektardan 113 sentner, “Narzi Suyun ota avlodlari” fermer xo‘jaligi 34 gektar maydondan 112 sentner, “Bahriddin bobo avlodlari” fermer xo‘jaligi 32 gektarda 110 sentner, “Xidir Xolmurod Shonazar” fermer xo‘jaligi 30 gektar maydonda 110 sentner hamda “Abdiyev Shoxrux” fermer xo‘jaligi a’zolari joriy mavsumda 27 gektar maydonda yetishtirilgan g‘alladan gektariga o‘rtacha 110 sentnerdan hosil ko‘tarib, davlat xirmoniga belgilangan donni ortig‘i bilan sotdilar va o‘z daromadlarini oshirdilar.
Aziz fermerlar!
G‘allachilik borasida yaratilgan imtiyoz va imkoniyatlardan unumli foydalaning. Prezidentimizning 2026-yil 8-maydagi “G‘o‘za va bug‘doy yetishtiruvchilarni moliyaviy qo‘llab-quvvatlashning qo‘shimcha chora-tadbirlari to‘g‘risida”gi PF–82-son Farmoni va boshqa qarorlar bilan Siz fermerlarga qator imtiyozlar berildi.
Jumladan:
- bug‘doy yetishtirish xarajatlari uchun ajratilgan imtiyozli kreditlarni hosil yilining 1-avgustiga qadar to‘liq qoplagan xo‘jaliklarga ushbu kreditlar bo‘yicha to‘langan foiz to‘lovining 4 foizlik punkt mablag‘lari fermer xo‘jaliklariga qaytarib beriladi;
- 2026-yil hosilidan boshlab g‘allani o‘z mablag‘lari yoki tijorat kreditlari hisobidan yetishtirib, uni belgilangan tartibda birja savdolari yoki davlat resursi uchun realizatsiya qilgan qishloq xo‘jaligi korxonalariga mahsulot qiymatining 10 foizi miqdorida subsidiya beriladi;
- 2026-yildan bank kreditlarini olmasdan, o‘z mablag‘lari hisobidan yomg‘irlatib sug‘orishni joriy qiladigan fermerlar uchun shartnomalar asosida subsidiyaning 50 foizi oldindan ajratilishi hamda texnologiyalar o‘rnatilib, ishga tushirilgandan so‘ng qolgan 50 foizi to‘lab berilishi yo‘lga qo‘yildi;
- davlat buyurtmasi asosida boshoqli don yetishtirish amaliyoti bekor qilinib, sohada bosqichma-bosqich bozor tamoyillari joriy etildi;
- fermer xo‘jaliklariga g‘alla yetishtirish uchun ajratilgan imtiyozli kredit mablag‘laridan erkin foydalanish hamda xizmat ko‘rsatuvchi va resurs yetkazib beruvchilarni ixtiyoriy tanlash huquqi berildi;
- donni xarid qilish hamda sotishda birja mexanizmining joriy etilishi kabi imtiyozlar qo‘llanilayotgani tufayli fermerlarning mablag‘lari tejalmoqda, iqtisodiy imkoniyatlari oshmoqda hamda g‘alladan yuqori hosil olish uchun puxta zamin yaratildi.
Qadrli fermerlar!
Har bir kun g‘animat ekanligini teran his etgan holda quyidagi ishlarni o‘z vaqtida amalga oshirishni unutmang:
Birinchidan, yetishtirgan hosilni qisqa muddatlarda yig‘ishtirib oling. Hatto bir kun bo‘lsa-da, o‘rimni kechiktirsangiz, har kuniga bir sentnerdan hosildorlik yo‘qotishingiz mumkin. G‘allani davlat zaxirasiga sotib, zimmadagi majburiyatingizni to‘liq bajarishga erishing va davlat jamg‘armasidan olingan imtiyozli kreditlarni o‘z vaqtida qaytarib, 4 foizlik imtiyozga ega bo‘ling.
Ikkinchidan, har gektar maydondan 100 sentnerdan va undan ortiq hosildorlikka erishib, yuqori daromad oling.
Uchinchidan, g‘alladan bo‘shagan maydonlarni peshma-pesh somondan tozalab, daromadli va eksportbop ekinlarni ekishni tashkil eting.
To‘rtinchidan, mahallangizdagi kam ta’minlangan oilalarga, yoshlarga hamda xotin-qizlarga takroriy ekin ekish uchun yer ajratib, saxovatpeshalik qilishni unutmang.
Beshinchidan, mamlakatimiz aholisini sifatli non va non mahsulotlari bilan ta’minlashda beminnat hissa qo‘shing.
Xalqimizning farovon yashashi va dasturxonimizning to‘kin-sochin bo‘lishi, bozorlarimiz non va non mahsulotlariga to‘la va arzon, turmushimiz yanada farovon bo‘lishi aynan Sizning bugungi g‘alla o‘rimini uyushqoqlik bilan o‘tkazishingizga va davlat zaxirasiga don sotishingizga bog‘liqligini unutmang.
Mamlakatimiz taraqqiyoti va yuksalishiga munosib hissa qo‘shish uchun barchangizni fidoyilik bilan sidqidildan ishlashga chorlaymiz!
Kitob tumani Fermerlari kengashi rayosati a’zolari.