Xalq deputatlari Kasbi tuman Kengashining VII-chaqiriq navbatdan tashqari o‘n birinchi sessiyasi bo‘lib o‘tdi
2025-12-30 14:00:00 / Majlislar
Sessiyada viloyat hokimi o‘rinbosari — viloyat Oila va xotin-qizlar boshqarmasi boshlig'i Ziyoda Aminova, shuningdek ijro organlari, huquqni muhofaza qiluvchi idoralar rahbarlari, jamoat tashkilotlari va ommaviy axborot vositalari vakillari ishtirok etdilar.
Sessiya yig‘ilishida tumanga oid bir qator muhim masalalar ko‘rib chiqildi. Sessiya yig‘ilishini amaldagi Kengash raisi hamda tuman hokimi — To'xtamurod Meyliyev olib bordi.
Kun tartibida quyidagi masalalar ko‘rib chiqildi:
1. Kasbi tumanining 2026-yilgi mahalliy byudjetini tasdiqlash to‘g‘risida;
2. Xalq deputatlari Kasbi tuman Kengashi raisini saylash to‘g‘risida;
Ma’lumki, yangi tahrirdagi O‘zbekiston Respublikasi Konstitutsiyasining 120-moddasiga muvofiq, Xalq deputatlari Kengashiga uning deputatlari orasidan saylangan rais boshchilik qilishi, hamda viloyat, tuman, shahar hokimi bir vaqtning o‘zida Kengash raisi bo‘lishi mumkin emasligi belgilab qo‘yilgan.
Konstitutsiyaning o‘tish qoidalariga asosan, 2024-yilda ilk bor Xalq deputatlari viloyatlar va Toshkent shahar Kengashlarining birinchi tashkiliy sessiyalarida deputatlar orasidan Kengash raislari saylab olindi.
Mazkur amaliyot 2026-yil 1-yanvardan boshlab barcha tuman (shahar) Kengashlariga tatbiq etilishi belgilangan.
Qonunchilikka muvofiq, Xalq deputatlari Kasbi tuman Kengashi raisi lavozimiga nomzodlarni tavsiya etish uchun siyosiy partiyalar vakillaridan iborat guruh tashkil etildi va tavsiya etilgan nomzodlar bo‘yicha ovoz berish o‘tkazildi.
Ovoz berish natijasiga ko‘ra, 2-Yuksalish saylov okrugi deputati Sharipov Shomurod Beshboyevich Xalq deputatlari Kasbi tuman Kengashi raisi etib saylandi.