Qoraqalpog‘iston Respublikasi Vazirlar Kengashining Raisi F.Ermanov bank sohasi vakillari ishtirokida tadbirkorlik subyektlari bilan ochiq muloqot o‘tkazdi
2025-07-21 12:05:00 / Yangiliklar
Mazkur uchrashuvdan ko‘zlangan asosiy maqsad - Davlatimiz rahbarining 2025-yil 27-yanvardagi PF-10-sonli Farmoni doirasida moliyalashtirilishi belgilangan investitsiya loyihalarini ko‘rib chiqish, uchrayotgan muammo va to‘siqlarni o‘rganish, ularni bartaraf etish bo‘yicha amaliy chora-tadbirlar belgilash, shuningdek, bank tizimi bilan samarali hamkorlikni ta’minlashdan iborat bo‘ldi.
Uchrashuvda ishtirok etgan tadbirkorlar tomonidan kredit ajratishdagi mavjud muammolar, garov ta’minoti, kafillik masalalari, bank xizmatlarining tezkorligi va sifati, shuningdek, moliyaviy qo‘llab-quvvatlash bo‘yicha qator murojaat va takliflar bildirildi.
Vazirlar Kengashi Raisi tomonidan har bir murojaat diqqat bilan tinglanib, tegishli tashkilot va bank rahbarlariga mavjud muammolarni joyida hal etish, tadbirkorlar bilan tizimli ishlash hamda ularning tashabbuslarini qo‘llab-quvvatlash bo‘yicha aniq vazifalarni yukladi.