Qurilish va infratuzilma loyihalarida hamkorlik istiqbollari muhokama qilindi
2026-09-10 11:55:00 / Yangiliklar
Muloqot davomida Qoraqalpog‘iston Respublikasida yo‘l va transport infratuzilmasini rivojlantirish, qurilish va muhandislik sohasidagi yirik loyihalarni amalga oshirish, mavjud infratuzilma obyektlarini rekonstruksiya va modernizatsiya qilish, shuningdek, gidrotexnik inshootlarni barpo etish va yangilash yo‘nalishlarida hamkorlikni yo‘lga qo‘yish masalalari atroflicha muhokama qilindi.
Tomonlar hududda amalga oshirilayotgan va istiqboldagi infratuzilmaviy loyihalarga xorijiy kompaniyalarni jalb etish, zamonaviy muhandislik yechimlari va ilg‘or tajribalarni tatbiq etish, shuningdek, o‘zaro manfaatli loyihalarni birgalikda amalga oshirish imkoniyatlarini ko‘rib chiqdilar.
Uchrashuvda, shuningdek, hamkorlikning istiqbolli yo‘nalishlarini belgilash, loyihalarni amalga oshirishning amaliy mexanizmlarini ishlab chiqish hamda kelgusida ikki tomonlama aloqalarni yanada rivojlantirish yuzasidan fikr almashildi.
“Saadullah Khan & Brothers” kompaniyasi muhandislik-qurilish ishlari, fuqarolik qurilishi, yo‘l va transport infratuzilmasi, gidrotexnik inshootlar hamda boshqa yirik infratuzilma loyihalarini amalga oshirishga ixtisoslashgan.
Kompaniya Pokistonda yirik davlat infratuzilma loyihalarini amalga oshirish, shuningdek, xalqaro tenderlarda ishtirok etish borasida katta tajribaga ega. Jumladan, kompaniya Swat Expressway loyihasida ishtirok etish uchun dastlabki malaka bosqichidan o‘tgan kompaniyalar qatoridan joy olgan.
SKB mutaxassislari yo‘l infratuzilmasini rivojlantirish, gidrotexnik inshootlarni rekonstruksiya qilish hamda boshqa yirik muhandislik loyihalarini amalga oshirishda tegishli tajribaga ega.
Uchrashuv yakunida istiqbolli loyihalar bo‘yicha hamkorlikni davom ettirish va mavjud imkoniyatlarni amaliy jihatdan o‘rganish muhimligi qayd etildi.