Qoraqalpog'iston Rеspublikаsi Vаzirlаr Kеngаshi

Xizmat safari davomida delegatsiya Pokistonning yirik sanoat, qishloq xo‘jaligi va biznes vakillari, shuningdek, hududiy davlat rahbariyati bilan uchrashuvlar o‘tkazib, savdo-iqtisodiy, investitsiyaviy va hududlararo hamkorlikni yangi bosqichga olib chiqishga xizmat qiladigan istiqbolli loyihalarni muhokama qildi.

Jumladan, Lahor shahrida Pokistonning kimyo sanoatidagi yetakchi korxonalaridan biri — “Nimir Industrial Chemicals Ltd” kompaniyasi rahbariyati bilan muzokaralar o‘tkazildi. Uchrashuvda Qoraqalpog‘istonning investitsiyaviy salohiyati, xorijiy investorlar uchun yaratilgan qulay shart-sharoitlar hamda hududdagi istiqbolli loyihalar taqdim etildi. Tomonlar Qo‘ng‘irot tumanida tuzni chuqur qayta ishlashga ixtisoslashgan zamonaviy kimyo sanoati korxonasini barpo etish bo‘yicha investitsiya shartnomasini imzoladi. Shuningdek, kompaniya vakillari loyihani joyida o‘rganish maqsadida joriy yil iyul oyining oxirida Qoraqalpog‘istonga tashrif buyurishga kelishib oldi.

Safar doirasida “Abdin International Pvt. Ltd.” kompaniyasi bosh direktori Navaz Hassan bilan ham samarali muzokaralar o‘tkazildi. Unda chorvachilik sohasini rivojlantirish, zamonaviy texnologiyalarni joriy etish, zotdor yirik shoxli qoramollarni ko‘paytirish va yem-xashak bazasini yaratishga qaratilgan qo‘shma loyihalar muhokama qilindi. Muzokaralar yakunida “Nukus Delisha” kompaniyasi bilan sheriklik asosida qo‘shma korxona tashkil etish, Pokistondan 200 bosh zotdor yirik shoxli qoramolni olib kelish hamda ushbu yo‘nalishda investitsiya loyihasini amalga oshirish bo‘yicha shartnoma imzolandi.

Delegatsiyaning muhim uchrashuvlaridan biri Pokistonning Panjob provinsiyasi Bosh vaziri Maryam Navaz Sharif bilan bo‘lib o‘tdi. Muloqot davomida O‘zbekiston va Pokiston o‘rtasidagi strategik sheriklik munosabatlarini hududlararo hamkorlik orqali yanada mustahkamlash masalalari muhokama qilindi.

Tomonlar Qoraqalpog‘iston va Panjob provinsiyasi o‘rtasida savdo-iqtisodiy, investitsiyaviy va sanoat kooperatsiyasini kengaytirish, qishloq xo‘jaligi, chorvachilik, to‘qimachilik, farmatsevtika, axborot texnologiyalari, tog‘-kon sanoati hamda logistika sohalarida qo‘shma investitsiya loyihalarini amalga oshirish yuzasidan fikr almashdi.

Shuningdek, Panjobning ilg‘or agrotexnologiyalarini Qoraqalpog‘istonda joriy etish, pokistonlik fermerlarni hududga jalb qilish, maxsus erkin iqtisodiy zonani tashkil etish, zamonaviy xalqaro logistika markazini barpo etish, yuqori qo‘shilgan qiymatga ega mahsulotlar ishlab chiqarishga yo‘naltirilgan investorlarni jalb etish bo‘yicha qator tashabbuslar ilgari surildi.

Madaniy-gumanitar hamkorlikni rivojlantirish maqsadida Nukus va Lahor shaharlari o‘rtasida birodarlik munosabatlarini yo‘lga qo‘yish taklifi ham qo‘llab-quvvatlandi hamda ushbu yo‘nalishda amaliy ishlarni boshlash bo‘yicha kelishuvga erishildi.

Umuman olganda, xizmat safari yakunlari Qoraqalpog‘iston Respublikasining investitsiyaviy jozibadorligini xalqaro maydonda yana bir bor namoyon etdi. Erishilgan kelishuv va imzolangan investitsiya shartnomalari hududda yangi ishlab chiqarish quvvatlarini yaratish, mahalliy xomashyoni chuqur qayta ishlash, zamonaviy texnologiyalarni joriy etish, yangi ish o‘rinlarini yaratish hamda to‘g‘ridan to‘g‘ri xorijiy investitsiyalar hajmini oshirishga xizmat qilishi bilan alohida ahamiyat kasb etadi.