Kiber xavfsizlikni ta’minlash masalalari yuzasidan muhim yig‘ilish o‘tkazildi
2026-04-10 16:30:00 / Yangiliklar
Mazkur tadbirda soha mutaxassislari, tegishli tashkilotlar vakillari hamda hududlardan tuman hokimlari video-konferensiya aloqa orqali ishtirok etdi. Uchrashuv davomida axborot xavfsizligini ta’minlash, shaxsiy ma’lumotlarni himoya qilish, kiber tahdidlarning oldini olish va ularga qarshi samarali kurashish masalalari yuzasidan keng muhokamalar olib borildi.
Tadbirda Ichki ishlar vaziri Baxtiyar Torebekov so‘zga chiqib, mamlakatimizda kiber xavfsizlikni ta’minlash borasida amalga oshirilayotgan islohotlar, mavjud tahdidlar va ularning oldini olish bo‘yicha ko‘rilayotgan choralar yuzasidan batafsil ma’lumotlar taqdim etdi. Shuningdek, vazir tomonidan raqamli makonda fuqarolarning huquq va manfaatlarini himoya qilish, axborot xavfsizligi madaniyatini yuksaltirish hamda profilaktik ishlarni kuchaytirish zarurligi alohida ta’kidlandi.
Shuningdek, zamonaviy kiber tahdidlar, xususan, zararli dasturlar va internet tarmog‘ida uchrashi mumkin bo‘lgan boshqa xavflar haqida tushuntirishlar berilib, ishtirokchilarga axborot xavfsizligi qoidalariga qat’iy rioya etish, kuchli parollardan foydalanish bo‘yicha amaliy tavsiyalar berildi.
Uchrashuv yakunida kiber xavfsizlik madaniyatini yuksaltirish, aholining raqamli savodxonligini oshirish hamda yoshlarni turli kiber tahdidlardan himoya qilishga qaratilgan ishlarni izchil davom ettirish muhimligi qayd etildi.