Ko‘chmas mulk bilan bog‘liq nizolarni endi onlayn hal qilish mumkin
2025-08-20 18:30:00 / Yangiliklar
“Ko‘chmas mulkka bo‘lgan huquqlarni davlat ro‘yxatidan o‘tkazish to‘g‘risida”gi Qonunning 9-bobida ko‘chmas mulkka oid nizolarni sudgacha hal etish mexanizmi belgilangan.
Shunga muvofiq, Vazirlar Mahkamasining 2023-yil 29-avgustdagi 426-son qarori bilan hududiy komissiyalar hamda apellyatsiya komissiyalari faoliyatini tartibga soluvchi nizom tasdiqlangan.
Ushbu qaror ijrosini ta’minlash maqsadida Kadastr agentligi tomonidan E-apellyatsiya axborot tizimi (apellatsiya.kadastr.uz) ishga tushirildi.
Mazkur tizim, murojaatlarni ochiq va shaffof ko‘rib chiqish, belgilangan muddat va tartibga qat’iy amal qilish hamda murojaatchilarning huquq va manfaatlarini ishonchli himoya qilish imkonini beradi.
Muhim yangilik: 2025-yil 21-avgustdan boshlab hududiy komissiyaga hamda hududiy komissiya qaroridan norozi bo‘lgan shaxslarning apellyatsiya komissiyasiga an’anaviy (qog‘oz shakldagi) murojaatlarini qabul qilish to‘xtatildi.
Endilikda jismoniy va yuridik shaxslarga kadastr idoralariga borib, yozma ariza topshirish shart emas. Shunchaki, apellatsiya.kadastr.uz saytiga kirib, onlayn murojaat qoldirishning o‘zi kifoya.