9-aprel — Sohibqiron Amir Temur tavalludining 689 yilligi
2025-04-09 09:00:00 / Yangiliklar
Bugun tarix sahifalarida oltin harflar bilan bitilgan buyuk siymo — Sohibqiron Amir Temur hazratlarining dunyoga kelgan kunidir. Oradan 689 yil o‘tgan bo‘lsa-da, uning jasorati, adolatparvarligi va donishmandligi yuragimizda barhayot.
"Kuch – adolatda!" degan shiorni hayotining bosh tamoyiliga aylantirgan Temuriylar sulolasining asoschisi, nafaqat yurtimiz, balki butun insoniyat tarixida chuqur iz qoldirgan zabardast sarkarda edi.
Sohibqiron barpo etgan saltanat — bu yuksak tafakkur, jasorat va fidoyilikning timsolidir. U ilm-fan, madaniyat va san’atga beqiyos hissa qo‘shib, kelajak avlodlar uchun mustahkam poydevor yaratdi.
Har bir sahifasi faxr ila o‘qiladigan Amir Temur merosi biz uchun ulug‘ saboq, buyuk qadriyatlar manbai, milliy g‘ururimizning asosi bo‘lib qolmoqda.
Bugun yurtimiz bo‘ylab mo‘tabar Sohibqiron xotirasiga ehtirom bajo keltirilib, uning tarixiy siymosi yodga olinmoqda. Uning barakali yo‘li bizni halollik, jasorat va ezgulik sari boshlaydi.