Kadastr agentligi hamda Moskva davlat geodeziya va kartografiya universiteti rahbari o‘rtasida uchrashuv bo‘lib o‘tdi
2026-03-26 19:05:00 / Yangiliklar
Kadastr agentligi hamda Moskva davlat geodeziya va kartografiya universiteti rahbari o‘rtasida uchrashuv bo‘lib o‘tdi.
Joriy yilning 26-mart sanasida Kadastr agentligi direktori o‘rinbosari A.X.Abdullayev hamda Moskva davlat geodeziya va kartografiya universiteti (MIIGAiK) rektori N.R.Kaminina rahbarligida idoralar o‘rtasida shakllangan o‘zaro manfaatli hamkorlikni rivojlantirish istiqbollarini muhokama qilish yuzasidan uchrashuv bo‘lib o‘tdi.
Uchrashuv davomida Agentlik va universitet faoliyati, ilmiy hamda ta’lim sohasida idoralararo hamkorlikda amalga oshirilayotgan qo‘shma loyihalar muhokama qilindi.
Jumladan:
Kadastr agentligi mutaxassislarini Moskva davlat geodeziya va kartografiya universitetida magistraturada o‘qitish kvotalarini oshirish;
O‘zbekistonlik tayanch doktorantlar (Oliy ta'limdan keyingi ta'lim) dissertatsiyalarini sinov tariqasida MIIGAiKda himoya qilish dasturini ishlab chiqish;
Yerni masofadan zondlash, geodeziya, kartografiya, geoaxborot texnologiyalari yo‘nalishida malaka oshirish treninglarini davomiy o‘tkazish kabilar muhokama qilindi.
Uchrashuv yakunida ikki davlat Oliy ta’lim muassasalari va sohaviy idoralar kollaboratsiya kadrlar salohiyatini oshirishga qaratilgan o‘zaro manfaatli hamkorlikni mustahkamlash bo‘yicha keyingi qadamlar belgilandi.
Ma’lumot uchun: 2024-2025-yillar davomida ilmiy-texnik hamkorlik doirasida MIIGAiK universitetida Agentlik va uning tizim xodimlaridan 58 nafar xodimi Yerni masofadan zondlash, geodeziya, kartografiya, geoaxborot texnologiyalari kabi turli yo‘nalishlarda professional malaka oshirish kurslarida ishtirok etgan, 23 nafari magistraturaga qabul qilingan. Magistratura uchun O‘zbekistonga berilgan kvotalar oshirilib joriy yilda ariza berganlar soni 30 nafarni tashkil etmoqda.