2025-yilda kadastr sohasida raqamli texnologiyalarni joriy etish va axborot tizimlarini integratsiya qilish boʻyicha muhim ishlar amalga oshirildi.
2026-03-16 15:20:00 / Yangiliklar
Jumladan, ilgari oʻzaro integratsiya qilinmagan “Davreestr”, “Koʻchmas mulk”, “Koʻchmas mulk-3” axborot tizimlari oʻrniga Jahon banki bilan hamkorlikda Kadastr va roʻyxatdan oʻtkazish integratsiyalashgan axborot tizimi — UZKAD ishga tushirildi. Ushbu tizim koʻchmas mulk va yer uchastkalariga oid maʼlumotlarni yagona platformadan yuritish imkonini bermoqda.
Koʻchmas mulkka boʻlgan huquqlar hisobini shaffof yuritish maqsadida open.ngis.uz ommaviy geoportali ishga tushirildi. Bu portal orqali fuqarolar va tadbirkorlar yer uchastkalari hamda koʻchmas mulk obyektlari haqida ochiq maʼlumot olish imkoniyatiga ega boʻlmoqda.
Shuningdek, koʻchmas mulkka boʻlgan huquqlarni davlat roʻyxatidan oʻtkazish xizmatlari toʻliq Davlat xizmatlari markazlari va Yagona interaktiv davlat xizmatlari portali orqali elektron shaklda amalga oshirilmoqda.
Yer va kadastr nazoratini raqamlashtirish maqsadida “E-Yer nazorat” axborot tizimi toʻliq ishga tushirilib, u Bosh prokuraturaning “E-material” hamda Ichki ishlar vazirligining “E-maʻmuriy ish” axborot tizimlari bilan integratsiya qilindi.
Bundan tashqari, kadastr inspektorlari tomonidan yer nazoratini maxsus planshetlar orqali joyning oʻzida elektron tarzda rasmiylashtirish amaliyoti yoʻlga qoʻyildi.
Yer uchastkalarini realizatsiya qilish jarayoni E-auksion elektron savdo platformasi hamda “Yerelektron” axborot tizimi bilan integratsiya qilinib, auksionda gʻolib boʻlgan yer uchastkalariga boʻlgan huquqlarni davlat roʻyxatidan oʻtkazish tizimi joriy etildi.
Geodeziya va kartografiya sohasida esa “Geodeznazorat” axborot tizimi orqali geodeziya ishlarining natijalarini ekspertizadan oʻtkazish va ularning elektron reestrini yuritish yoʻlga qoʻyildi.
Shuningdek:
- barcha kadastr xizmatlari Yagona billing tizimiga oʻtkazildi;
- koʻchmas mulk maʼlumotlarini tahrirlash boʻyicha elektron ariza xizmatlari ishga tushirildi;
- geodeziya va kartografiya ishlarini roʻyxatga olish boʻyicha qarorlarni “Litsenziya” axborot tizimi orqali onlayn olish imkoniyati yaratildi.
Bugungi kunda kadastr maʼlumotlar bazasi 30 dan ortiq davlat organlari va idoralari axborot tizimlari bilan integratsiya qilingan holda ishlamoqda.
Kadastr agentligi direktor o'rinbosari - Abdullayev Abdushukur Xamidovich