Kanadaning Bankrotlik bo‘yicha superintendant ofisi bilan uchrashuv o‘tkazildi
2026-10-03 11:00:00 / Yangiliklar
Avval xabar berilganidek, joriy yilgi Xalqaro to‘lovga qobiliyatsizlik regulyatorlari assotsiatsiyasi (IAIR) konferensiyasi Kanada mezbonligida o‘tkazilmoqda.
Tadbir doirasida O‘zbekiston Respublikasi adliya vazirining birinchi o‘rinbosari M. Istamov Kanadaning Bankrotlik bo‘yicha superintendant ofisi (KBSO) rahbari E. Leng bilan uchrashdi.
M. Istamov O‘zbekistonda Adliya vazirligi huzurida To‘lovga qobiliyatsizlik ishlari agentligi tashkil etilgani, sohadagi qonunchilikni takomillashtirish, suddan tashqari va sud sanatsiyasi mexanizmlarini rivojlantirish, sud boshqaruvchilari institutini mustahkamlash hamda jarayonlarni raqamlashtirish bo‘yicha amalga oshirilayotgan islohotlar haqida ma’lumot berdi.
Uchrashuv davomida Kanadada to‘lovga qobiliyatsizlik va bankrotlik sohasini davlat tomonidan tartibga solish tizimi, KBSOning vakolatlari va faoliyat mexanizmlari, litsenziyaga ega to‘lovga qobiliyatsizlik bo‘yicha mutaxassislar faoliyatini nazorat qilish, ularning kasbiy standartlari hamda javobgarligini ta’minlash masalalari muhokama qilindi.
Shuningdek, sud boshqaruvchilarini tayyorlash va litsenziyalash, ularning malakasini oshirish tizimini takomillashtirish uchun Kanada ekspertlarini jalb qilish, qo‘shma o‘quv dasturlarini yo‘lga qo‘yish hamda to‘lovga qobiliyatsizlik sohasidagi qonunchilikni isloh qilish masalalari muhokama qilindi.
Uchrashuv yakunida ilg‘or tajribalarni o‘rganish, mutaxassislar o‘rtasida tajriba almashish va ikki tomonlama institutsional hamkorlikni yo‘lga qo‘yish va rivojlantirishga kelishib olindi.