IIV Tezkor-qidiruv departamenti tomonidan hamkorlikda oʻtkazilgan tadbirda Toshkent shahri hududida sintetik giyohvandlik vositasini tarqatish bilan shugʻullanib kelgan shaxs qoʻlga olindi
2024-09-12 15:00:00 / Yangiliklar
Ayni vaqtda Poytaxtimiz hududida yoshlar orasida giyohvandlik vositalari, psixotrop moddalar va kuchli taʼsir qiluvchi dori vositalari noqonuniy muomalasiga qarshi kurashish hamda ularni oldini olish borasida tizimli profilaktik-targʻibot va tezkor-qidiruv tadbirlari olib borilmoqda.
IIV Tezkor qidiruv departamenti, Toshkent shahar IIBB hamda DXX tomonidan hamkorlikda oldindan tezkor ishlovga olingan, 2001-yilda tugʻilgan shaxsning vaqtincha yashab kelayotgan Yakkasaroy tumanidagi xonadoni koʻzdan kechirildi.
Uyning mehmonxonasi, yotoqxonasi va oshxonasining turli joylarida jami 500 gramm sintetik giyohvandlik vositasi, elektron tarozi, giyohvandlik vositasi izlari bilan shisha idishlar, izolyatsiya lentasi, zip paketlar, ashyoviy dalil sifatida olindi.
Texnik tekshiruvlar davomida qoʻlga olingan shaxs “Telegram” messenjeridagi internet doʻkonida “kladmen” lavozimida ishlashi kuratori topshirigʻiga asosan taxminan 1 kg vazndagi sintetik giyohvandlik vositalarini koʻmilgan joydan olib, bir marotabalik isteʼmol dozalariga qadoqlab, soʻng “zakladka” usulida tarqatib kelayotganligi aniqlandi. U mazkur moddalarni tarqatishda Toshkent shahrining bir nechta hududlarida aholi yashash joylari atrofida chizgan giyohvandlik vositalariga olib boruvchi manzil narkografitti havolalari yoʻq qilindi.
Oʻtkazilgan tezkor-qidiruv tadbirlari natijasida noqonuniy muomaladan chakana narxi 600 mln soʻmga teng 500 gramm sintetik giyohvandlik vositalari olinib, tezkor-qidiruv tadbirlari davom ettirilmoqda.
IIV Tezkor-qidiruv departamenti